Aero Dili loke rute Dili-Xina hetan rendimentu di’ak
DILI, 22 Setembru 2025 (TATOLI)–Emprezariu timoroan hanesan mós na’in ba aviaun Aero Dili, Lourenço de Oliveira, informa Aero Dili hetan rendimentu di’ak bainhira loke rute Dili-Xina tanba aviaun sempre ba-mai nakonu.
Notísia Relevante: Aero Dili inaugura vou diretu entre Dili no sidade Xiamen
“Hanoin ita-nia rute ba Xina ne’e aviaun ba-mai nakonu hela de’it. Nune’e mak ohin ami mai hato’o agradesementu ba Prezidente Repúblika tanba nia vizita ba Xina iha tinan kotuk mak ko’alia ho Prezidente Xina, ikus ami koopera hamutuk loke rute ba Xina. Agora, buat hotu la’o ho di’ak,” Lourenço hateten ba jornalista sira iha Palásiu Prezidensiál Nicolau Lobato, Bairru Pite Dili, segunda ne’e.
Nia dehan, daudaun ne’e rute Aero Dili ba Xina iha sidade naran Xiamen, Cina (XMN) no daudaun ne’e planu hela atu halo tan rute ida ba sidade Futsou.
“Agora ita-nia rute Dili ba sidade Xiamen, ida fali ami sei prosesa hela mak atu semo ba Futsou sidade Xina nian, ida-ne’e atu loke dalan ba turista sira bele mai vizita ita-nia nasaun. Tuir planu, ita hakarak kalendáriu ne’e semana ida Dili-Xiamen dala-rua (2) Dili Futsou mós dala-rua (2), ita loraik sai husi ne’e ba Xina dadeer ita fila kedan mai,” nia hateten.
Nia hatutan, iha fulan-Dezembru me’e Aero Dili loke tan rute Dili-Austrália ne’ebé sei semo ba sidade rua (2) Darwin ho Melbourne.
“Ba Austrália nian, buat hotu loos ona. Avizaun sivíl Austrália nia aprova ona, Governu nasaun rua mós iha ona aseitasaun, ne’ebé fulan-Dezembru ita hahú semo ba ona. Ita sei opera ho aviaun rua (2) ne’ebé mak iha ne’e, se ita haree merkadu sa’e maka’as mak ita foin bele aumenta tan aviaun. Maibé agora la’e, ita sei haree kapasidade pasajeiru nian,” nia relata.
Daudaun ne’e, Aero Dili halo hela operasaun kada loron Dili-Bali-Indonézia la’o ho normál.
Jornalista : Hortencio Sanchez
Editór : Cancio Ximenes
