DILI, 14 Fevereiru 2025 (TATOLI) – Kompañia área Timor-Leste Aero Dili inaugura, ohin, vou dahuluk ligasaun entre Dili no sidade xineza Xiamen ho númeru pasajeiru 50-resin.
Inaugurasaun rota foun ne’e husi Prezidente Repúblika, José Ramos Horta, membru Governu sira, Diretór-Ezekutivu Aero Dili, Lourenço de Oliveira, no Embaixadora Xina iha Timor-Leste, Wang Wenli.
Iha ámbitu serimónia ne’e, Xefe Estadu kongratula Diretór-Ezekutivu Aero Dili, tanba brani no la ta’uk risku hodi investe iha kompañia aérea ne’e.
Prezidente Repúblika hateten rota foun ida-ne’e la’ós fasilita de’it mobilidade entre nasaun rua ne’e, maibé mós hametin liután kooperasaun entre Timor-Leste no xina.
“Ami hein katak vou entre Dili no Xiamen, Xina, sei dada turista xineza sira mai vizita Timor-Leste hodi hamosu tan oportunidade ekonómika, promove ita-nia patrimóniu kulturál no naturál, no hametin kooperasaun bilaterál”, Ramos Horta hateten iha Aeroportu Internasionál Nicolau Lobato, Komoro, ohin.
Xefe Estadu ne’e dehan Aero Dili sei halo vou dala-rua kada fulan no neineik sei aumenta ba dahaat no iha futuru, semo dala-ualu iha kada fulan. “Ida-ne’e di’ak tebes, tanba Aero Dili mós iha planu sei alarga tan [rota] husi Dili bá Austrália-Melbourne no Dili-Darwin”.
Nia dehan iha paralelu Aero Dili ho nia parseiru sira iha Xina serbisu daudaun ona atu kria pakote turizmu nian ne’ebé integra Dili no Bali hodi hasa’e liután turizmu iha rejiaun ne’e.
“Ha’u hato’o ha’u-nia parabéns ba ekipa Aero Dili nian, liuliu Lourenço de Oliveira nu’udar timoroan ida ne’ebé iha mehi boot ho ninia dedikasaun no kompromisu hodi realiza mehi importante ida-ne’e sai realidade”, dehan.
Iha fatin hanesan, Ministru Transporte no Komunikasaun, Miguel Manetelu, salienta katak inisiativa ida-ne’e importante tebetebes iha Timor-Leste nia istória, tanba haluan tan konetividade internasionál entre Dili no Xina, aleinde Indonézia, Singapura, Austrália no tempu badak ho Malázia.
Nia afirma katak iha Governu Dasiak fó importánsia ba setór transporte nu’udar pilár importante iha dezenvolvimentu ekonómiku nasaun nian. Hodi salienta katak Ezekutivu nia papél mak atu kria kondisaun, hasa’e kreximentu ekonómiku, hadi’a no aumenta sirkulasaun ema no sasán tuir vizaun ne’ebé hatuur ona iha Planu Estratéjiku Dezenvolvimentu 2011 – 2030.
“Transporte aéreo sai nu’udar servisu-xave ida ba movimentu ema no sasán mai ita-nia rai no husi ita-nia rai bá rai-li’ur no sei tulun dudu dezenvolvimentu indústria turístika, komérsiu no negósiu seluk, liuliu atu hetan konfiansa ba ligasaun entre Timor-Leste no destinu rejionál no internasionál mak Governu sei esforsu atu kria kondisaun ba aumentu vou regulár ho opsaun barak”, nia adianta.
Governante ne’e espera katak vou direta entre Dili no Xiamen sei fó konfiansa tan ba país sira seluk, liuliu membru ASEAN nian hodi bele loke odamatan ba Timor-Leste atu iha konetividade direta ba sira-nia rai, nomós husi sira-nia rai mai país.
Diretór-Ezekutivu Aero Dili, Lourenço de Oliveira, agradese ba Governu Xina no Timor-Leste, liuliu ba Prezidente Repúblika, José Ramos Horta, ne’ebé fó lia menon murak antes aviaun semo bá Xina. “Ami sei fó servisu di’ak ba ami-nia pasajeiru sira hotu”, nia garante.
Vou dahuluk ne’e ho pasajeiru 50-resin, kompostu husi delegasaun 23 no pasajeiru baibain 30-resin ho kustu billete kada ema $480.
Embaixadora Xina iha Timor-Leste Wang Wenli, hateten vou direta husi Aero Dili bá Xina ne’e parte pozitivu tebes, tanba garante relasaun bilaterál entre nasaun rua ne’e.
Notísia relevante: Aero Dili sei espande rota foun, Dili-Xina hahú iha Fevereiru
Jornalista: Arminda Fonseca
Editora: Maria Auxiliadora
