DILI, 05 Fevereiru 2025 (TATOLI) – Empreza Aero Dili sei alarga, iha tinan ne’e, nia operasaun hodi lansa rota aérea internasionál foun entre Timor-Leste, Xina no Austrália.
Empreza ne’e hetan ona aprovasaun semo husi Administrasaun Aviasaun Sivíl Xina (CAAC, sigla inglés) no Autoridade Aviasaun Sivíl Timor-Leste (AACTL, sigla portugés) hodi hahú vou dahuluk iha loron 14 Fevereiru 2025, rota bá Dili-Xiamen.
Diretór-Ezekutivu Aero Dili, Lourenço de Oliveira, informa katak rota foun ne’e hanesan marka istória foun ida tan ba empreza, tanba iha loron 12 Maiu 2023 lansa ona rota internasionál dahuluk ho bandeira Timor-Leste bá Indonézia.
“Tinan rua liubá ami halo inaugurasaun ba ami-nia aviaun dahuluk Airbus A320-232 no ami hahú semo bá Indonézia no Singapura. Tinan ne’e, ha’u-nia planu mak semo tan bá Xina no Austrália”, Lourenço de Oliveira dehan ba Tatoli iha eskritóriu Aero Dili, Timor Plaza, ohin.
Nia hatutan katak vou dahuluk husi Aeroportu Internasionál Prezidente Nicolau Lobato Komoro bá Aeroportu Internasionál Xiamen Gaoqi iha Xina ne’e sei hahú semo kada semana dala-ida hafoin mak aumenta ba dala-tolu iha semana ida.
Lourenço de Oliveira hatutan kona-ba sasemok direta bá Austrália sei iha hela prosesu aprovasaun nia-laran, tanba la’ós de’it hetan aprovasaun husi AACTL, maibé mós husi Autoridade Seguransa Aviasaun Sivíl Austrália (CASA, sigla inglés).
“Vou bá Austrália nian ne’e sei iha hela prosesu, maibé ami tenta hetan akordu iha tinan ne’e hodi kompleta vou Dili – Melbourne no Dili – Darwin”, nia adianta.
Lembra katak, iha 12 Maiu 2023, Aero Dili lansa nia vou internasionál dahuluk ne’ebé ajenda ona entre Dili-Denpasar/Bali, Indonézia, no daudaun fornese hela servisu aéreu loroloron nian. Espansaun rota bá Singapura lansa iha Fevereiru 2024 ho oráriu semo semana ida dala-ida iha loron sábadu.
Aviaun modelu A320 ne’e iha kapasidade transporta pasajeiru 180 no ideál mak 165 para sente konfortavel durante viajen. Aviaun ne’e mós halo vou doméstiku entre Dili-Oekusi.
Notísia relevante: Aero Díli lansa vou dahuluk bá Singapura, PR Horta ho ekipa pasajeirus dahuluk
Jornalista: Arminda Fonseca
Editora: Maria Auxiliadora
