SINGAPURA, 24 fevereiru 2024 (TATOLI)-Aviaun Aero Dili, sábadu ne’e, lansa ona vou dahuluk bá nasaun Singapura, hafoin iha loron 20 fulan-marsu 2023 liubá halo lansamentu vou bá nasaun Indonézia.
Iha viajén dahuluk ba nasaun Singapura ne’e, Prezidente Repúblika, José Ramos Horta, Ministru Negósiu Estranjeiru no Kooperasaun (MNEK), Bendito Freitas hamutuk ho ekipa no pasajeiru seluk tan mak sai pasajeiru dahuluk iha lansamentu vou dahuluk ne’e iha loron 24 fulan-fevereiru 2024.
Notísia Relevante :Aviaun Aero Dili sei realiza vou komersiál dahuluk iha 28 marsu
Iha Aeroportu Changi Singapura, Xefe Estadu, José Ramos Horta, apresia ho atendimentu hosi servisu Empreza Aero Dili tanba aviaun ne’e semo tuir oras no konfortavél durante vianjén ne’e.
“Pilotu no pesoál (staff) sira halo servisu ne’ebé tuir oras iha primeiru vou nian. Viajén ohin nian ne’ebé semo simbolikamente ba Singapora perfeitu tebes,”dehan Horta, iha Aeroportu Changi.
Na’in ba Empreza Aero Díli, Lourenço de Oliveira no emprezáriu Chinês balun, iha sábadu ne’e simbolikamente lansa vou ba dala-uluk hodi hala’o viajén ba mai Dili no Singapura iha futuru.
Tuir oráriu Aero Dili sei halo viajén hosi Dili ba Singapura iha loron tersa-feira no sábadu, enkuantu hosi Singapura mai Dili iha loron Kuarta-Feira no Domingu.
Objetivu hosi viajén Xefe Estadu ho ekipa bá Singapura ne’e atu partisipa Konferénsia Ministeriál ba da-13 (KF13) OMK nian, ne’ebé sei hala’o iha loron 26 to’o 29 fevereiru 2024, iha Abu Dhabi (Emiradu Árabe Unidu).
No Governu liuhosi reuniaun Konsellu Ministru (KM) estraordinária, foinlalais ne’e, delibera hodi fó podér tomak ba Vise Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, reprezenta Timor-Leste asina protokolu adezaun Timor-Leste ba Organizasaun Mundiál Komérsiu (OMK).
Entertantu, iha tinan kotuk, iha Governasaun da ualu, iha loron 20 fulan-marsu 2023 liubá, Prezidente Repúblika (PR), José Ramos Horta, akompaña husi Ministru Transporte no Komunikasaun (MTK), José Agustinho da Silva, Diretór-Ezekutivu empreza Aero Dili, Lourenço de Oliveira, no espoza, halo inaugurasaun ba aviaun Aero Dili ho marka A320, iha Aeroportu Internasionál Prezidente Nicolau Lobato (AIPNL), Comoro. Aviaun ho bandeira Timor-Leste ne’e semo dahuluk iha loron 28 marsu ne’e.
Antes ne’e, Aero Dili inaugura ona ligasaun aérea ba dahuluk entre Dili-Bali (Indonézia) iha 23 janeiru. Aviaun ne’e ho totál kadeira hamutuk 162 kompostu hosi kadeira ualu ba primeira klase.
Notísia Relevante :PR Horta apresia aviaun Aero Dili sei semo ho bandeira RDTL
Jornalista: Joanico de Araújo
Editór : Agapito dos Santos
