DILI, 10 Setembru 2025 (TATOLI)–Arsebispu Metropolitana Dili, Don Virgílio Kardeál do Carmo da Silva, SDB, solisita sarani timoroan atu banati tuir lala’ok Nossa Senhora ne’ebé Papa Francisco fó-sai liuhosi omília iha Tasi-Tolu, Dili, 10 Setembru 2024.
“Omília Papa Francisco nian ne’ebé hato’o iha fatin ida-ne’e (Tasi-Tolu) ko’alia kona-ba Maria nia moris no simplisidade ho intesaun bolu ita hodi hateke ba Maria nia istória atu aprende husi feto-raan simples ida-ne’e, ne’ebé hili atu sai ki’ik no haraik aan nafatin,” Don Virgílio Kardeál do Carmo da Silva hateten liuhusi omília iha misa selebrasaun tinan-ida vizita Papa Francisco iha Timor-Leste, iha Tasi-Tolu, Kuarta ne’e.
Bispu Dioseze Dili relata litúrjia referida hatudu katak vokasaun Na’in-Feto Maria hanesan evanjelista São Lucas haktuir kona-ba São Gabriel vizita Na’in-Feto relasiona ho notísia ksolok nian ne’ebé kumprimenta ho liafuan “Haksolok ba ida-ne’ebé nakonu ho grasa, Maromak ho ita”.
Notísia relevante: Don Virgílio hasa’e orasaun ba Papa Francisco atu harohan ba timoroan moris iha unidade
Don Virgílio Kardeál argumenta Maria nu’udár feto-raan husi Nazareth, rai ne’ebé tristéria no dook husi atensaun mundu nia-matan maibé Nai nia matan no laran hateke ba knua ki’ik referidu hili Maria hodi ko’us Jezús Kristu ne’ebé soi ema hotu.
“Papa Francisco dezorta ba ita hotu dehan maun-alin, inan-feton sira keta ta’uk atu sai ki’ik iha Maromak futar-oin no ema seluk nia oin,” nia subliña.
Líder Igreja ne’e enkoraja timoroan hotu atu labele lakon esperansa moris no fó tempu ba Maromak inklui haree fali moris foun hodi husik buat aat nune’e bele moris di’ak liután no haksolok.
Entretantu, selebrasaun misa asaun ba grasa hodi selebra tinan-ida vizita Papa Francisco iha Timor-Leste hetan entusiazmu husi sarani, padre, madre inklui relijiozu sira-ne’ebé tuir ajenda ramata misa sei kontinua ho vijília no konsertu ho tema ‘Joven Barullu’.
Rekorda fali karak vizita Papa Francisco iha Timor-Leste durante loron-tolu, 9-11 Setembru 2024 ne’ebé maioria sarani Katólika husi territóriu prezensa iha misa santu purvolta rihun 700-resin.
Jornalista: Natalino Belo
Editór: Xisto Freitas da Piedade
