Inséndiu iha Triloka rezulta sasán iha kioske estraga totál

BAUKAU, 05 Agostu 2026 (TATOLI)—Kiokse ida isendiadu rezulta sasán nesesidade bázika ne’ebé fa’an la salva iha Suku Triloka, Postu Administrativu Baukau Vila, Munisípiu Baukau.

Kazu referidu akontese iha Domingu (03/08/2026) purvolta meudia tuku 09:00 Otl, iha-ne’ebé ahi alastra liuhusi iskeiru ne’ebé alastra tutan ba gozolina iha balde entaun rezulta sasán iha kioske mutuk no produtu nesesidade bázika la salva.

Komandante Operasaun Autoridade Protesaun Sivíl (APC-sigla portugeza), Francisco Viana Freitas, hateten bainhira kazu ne’e akontese, parte autoridade to’o kedas iha lokál akontesimentu hodi rekolla informasaun, dadus no apoia emerjénsia ba vítima iha loron-Segunda (04/08/2026).

“Na’in iha maibé sira salva aan enkuantu sasán iha kioske labele salva,” Viana hateten iha ninia kna’ar fatin, Kuarta ne’e.

Entretantu, Vítima Celeste Pinto Guterres nu’udar na’in ba kioske, relata katak bainhira inséndiu ne’e akontese, família mak salva nia uma ne’ebé besik kiokse, enkuantu vítima nia oan naran Aldina Melánia Pinto, idade 16, hetan kanek iha ain kabun parte karuk no evakua kedas bá Ospitál Rejionál Eduardo Ximenes (HoREX-sigla portugeza) hodi hetan tratamentu.

“Ha’u bá tiha merkadu, filamai akontesimentu ramata ona. Família sira mak salva, lae karik ahi han hotu uma,” Celeste Guterres haktuir.

Inséndiu referidu rezulta produtu nesesidade bázika kompostu husi foos saka neen, mina, manutolun, sabaun no seluk tan ne’ebé ho valór orsamentu hamutuk $600 resin.

Entretantu, APC Baukau apoia emerjénsia ba vítima hanesan hahán no ekipamentu koziña kompostu husi foos, mina, hahán lata, supermie, sana, tasu, bikan, kanuru no seluk tan.

Jornalista: Natalino Belo 

Editór: Xisto Freitas da Piedade