Tatoli konsulta padraun kompeténsia sentru formasaun ho INDIMO 

DILI, 05 Agostu 2026 (TATOLI) – Prezidente Konsellu Diretivu Ajénsia Notisioza Timor-Leste Tatoli, I.P, Noémio Falcão, hasoru malu ho Diretora Institutu Nasionál Dezenvolvimentu Mão-de-Obra (INDMO), Isabel Fernandes de Lima, hodi diskute kona-ba oportunidade hametin kooperasaun institusionál, liuliu ba dezenvolvimentu no sertifikasaun Sentru Formasaun Jornalizmu ajénsia notisioza ne’e.

Iha reuniaun ne’e, partisipa mós husi kargu xefia no asesór sira husi instituisaun rua ne’e, aborda dalan atu hametin parseria iha área dezenvolvimentu rekursu umanu, formasaun profisionál no mekanizmu sertifikasaun ba sentru formasaun tuir padraun nasionál.

Prezidente Konsellu Diretivu Tatoli, Noémio Falcão, subliña estabelesimentu Sentru Formasaun Jornalizmu ne’e reflete vizaun estratéjika Tatoli nian atu kontribui ba dezenvolvimentu rekursu umanu iha setór mídia no komunikasaun sosiál.

“Tatoli mós hakarak sai sentru ida ba dezenvolvimentu kapasidade jornalista no profisionál komunikasaun sosiál sira. Iha era transformasaun dijitál, kompeténsia iha área jornalizmu multimídia, intelijénsia artifisiál, verifikasaun faktu, seguransa dijitál no utilizasaun teknolójia foun sai nesesidade ida. Tanba ne’e, Sentru Formasaun Jornalizmu Tatoli sei loke oportunidade ba jornalista no profisionál sira, husi setór públiku no privada, atu kontinua hasa’e sira-nia kapasidade no profisionalizmu”, Noémio Falcão hatete.

Nia hatutan katak Tatoli valoriza tebes parseria ho INDMO tanba instituisaun ne’e iha esperiénsia no kompeténsia atu akompaña dezenvolvimentu sentru formasaun no asegura katak programa sira ne’ebé sei implementa responde ba nesesidade merkadu serbisu ho profisionál.

Diretora Nasionál INDMO, Isabel Fernandes de Lima, apresia inisiativa Tatoli ne’ebe hahú estabelese sentru formasaun ida ne’ebé sei fó kontribuisaun ba dezenvolvimentu profisionál jornalista Timor-Leste.

“INDMO haree inisiativa ida-ne’e nu’udar pasu importante atu hametin kualidade rekursu umanu iha setór mídia. Ami prontu atu serbisu hamutuk ho Tatoli, fó orientasaun téknika no akompaña prosesu sertifikasaun tuir norma no prosedimentu ne’ebé vigór, nune’e sentru formasaun ne’e bele dezenvolve ho padraun ne’ebé di’ak no hetan rekoñesimentu ofisiál”, Isabel Fernandes de Lima dehan.

Asesór Jurídiku INDIMO, David da Costa Patrício, hateten Tatoli hanesan instituisaun Estadu ida ne’ebé iha finansiamentu no kondisaun di’ak. Espera ho estabelesimentu sentru formasaun bele eleva kapasidade fomandu sira. Liuliu sentru balun ne’ebé fó formasaun to’o nivel 1, nivel 2, Tatoli bele forma ema ho nivel 3 no 4.

“Ida-ne’e mak ita hakarak, nune’e labele fó formasaun ne’ebé hanesan no barabarak, rezultadu laiha. Ita espera Tatoli bele fó nivel ida-ne’ebé boot liu tanba ita haree ein termu instituisaun Governu nian, kestaun finanseira nian posibilita bele fó nivel boot tanba iha kondisaun no finansiamentu. Ita enkoraja Tatoli labele hanoin de’it formasaun to’o nivel, 1, nivel 2, maibé bele to’o nivel 3, nivel 4”, nia realsa.

Durante reuniaun ne’e, Tatoli mós aprezenta programa oioin ne’ebé daudaun hala’o ona, inklui Tatoli Kredivel, ne’ebé fó espasu ba institutu públiku no empreza públika sira atu hato’o informasaun kona-ba sira-nia programa, serbisu no rezultadu ba sosiedade.

Iha oportunidade ne’e, Prezidente Tatoli konvida Diretora Nasionál INDMO atu partisipa iha programa referidu hodi fahe informasaun kona-ba misaun, prioridade, progresu no dezafiu sira husi INDMO.

Sentru Formasaun Jornalizmu Tatoli ne’e rasik foin inaugura husi Primeiru-Ministru, Xanana Gusmão, iha loron 27 Jullu 2026, iha aniversáriu Tatoli nian ba da-X.

Notísia relevante: Primeiru-Ministru inaugura edifísiu foun Ajénsia Tatoli I.P

Jornalista: Arminda Fonseca

Editora: Maria Auxiliadora