Primeiru-Ministru inaugura edifísiu foun Ajénsia Tatoli I.P
DILI, 27 Jullu 2026 (TATOLI) – Primeiru-Ministru, Xanana Gusmão, inaugura ohin edifísiu foun Ajensia Notisioza Timor-Leste Tatoli Institutu Públiku (I.P) iha Faról, Dili.Serimónia inaugurasaun ne’e akompaña husi Ministru Planeamentu no Investimentu Estratéjiku (MPIE), Gastão de Sousa, Sekretáriu Estadu Komunikasaun Sosiál (SEKOMS), Expedito Loro Dias Ximenes, Prezidente Komisaun C ne’ebé trata Asuntu Finansa Públika, iha Parlamentu Nasionál, Cedelízia Faria dos Santos, no konvidadu sira seluk.
Inaugurasaun ne’e hala’o iha ámbitu komemorasaun aniversáriu Tatoli nian ba dekada ida. Aleinde ne’e, halo mós lansamentu ba aparénsia foun portál Tatoli no Sentru Formasaun Jornalizmu ba públiku.
Prezidente Konsellu Diretivu Tatoli, Noémio Falcão, hateten hamutuk ho funsionáriu hotu orgullu, tanba Tatoli tama ona etapa foun ida ho edifísiu ida ne’ebé sai símbolu ida ba dezenvolvimentu instituisionál no investimentu Governu ba setór komunikasaun sosiál.
Nia agradese ba Ministru Planeamentu Investimentu Estratejiku, Gastão de Sousa, ne’ebé hatene kle’an serbisu jornalizmu nu’udar pilár importante ba demokrasia.
“Ministru fó resposta ho lais tebes ba ami-nia proposta no serbisu hamutuk ho Sekretáriu Estadu Komunikasaun Sosiál, Expedito Loro Dias Ximenes, no parseiru sira hotu”, nia hato’o.
Dirijente Tatoli ne’e agradese ba empreza Leldu Unipessoal Lda., ne’ebé finaliza projetu ne’e ho di’ak tebes.
“Ho espasu ida-ne’e, ha’u fiar katak fó biban Di’ak liután ba kolega funsionáriu no jornalista sira hotu nia serbisu. Edifísiu ida-ne’e ami utiliza ba servisu Multimídia no Sentru Formasaun Jornalizmu”, dehan.
Obra konstrusaun edifísiu foun ho andar rua hala’o durante tinan ida ne’ebé gasta orsamentu rihun $165.Ajénsia Tatoli, I.P., nu’udár ajénsia ofisiál Estadu Timor-Leste nian. Ezisténsia Tatoli maihusi inisiativa Sekretaria Estadu Komunikasaun Sosiál (SEKOMS), iha 2012- 2017 nu’udár transformasaun husi ETNA (East Timor News Agency), ne’ebé nakfilak ba ANTIL (Ajénsia Notisioza Timor-Leste).
Ajénsia Estadu ne’e hetan aprovasaun iha Konsellu Ministru no públika iha Jornál Repúblika iha loron 14 Marsu 2016, nu’udár embriaun ho naran ANTIL ne’ebé lansa iha 27 Jullu 2016. Fulan-Marsu 2017, Konsellu Ministru aprova ANTIL sai Tatoli, nu’udár ajénsia ofisiál Estadu Timor-Leste nian no publika iha Jornál Repúblika, ho estatutu nu’udár Institutu Públiku (I.P.).
Objetivu estabelese Tatoli sai fonte informasaun ofisiál Estadu Timor- Leste ne’ebé iha kapasidade elabora produtu informasaun no notísia ne’ebé nesesita husi públiku utilizadór informasaun iha eskala nasionál, rejionál no internasionál bazeia ba natureza no karaterístika, rapidéz no rigór, maibé labele ignora nia rigorozidade hanesan akurasia, independente, izenta, klareza no nafatin iha integridade nomós kredibilidade.
Notísia relevante: Primeiru-Ministru husu Tatoli atu investe iha rekursu umanu no jornalizmu investigativu
Jornalista: Nelson de Sousa
Editora: Maria Auxiliadora
