Primeiru-Ministru husu Tatoli atu investe iha rekursu umanu no jornalizmu investigativu
DILI, 27 Jullu 2026 (TATOLI) – Primeiru-Ministru, Xanana Gusmão, husu ba Ajénsia Notisioza Timor-Leste Tatoli, Institutu Públiku (I.P), atu kontinua investe iha dezenvolvimentu rekursu umanu, liuliu jornalista sira, hodi hasa’e kualidade informasaun no dezenvolve jurnalizmu investigativu.
Mensajen ne’e hato’o iha serimónia komemorasaun aniversáriu ba dékada ida Tatoli nian, ne’ebé realiza iha edifísiu Tatoli, Faról, ohin.
Xefe Ezekutivu dehan katak mídia iha papél importante tebes nu’udar kanál ida atu fó informasaun kredivel ba povu.
“Nu’udar institutu públiku Estadu nian, saida mak husu ba Tatoli, imi hotu no Prezidente ho membru sira, atu prepara-an no jornalista sira, hodi prodús notísia ho di’ak”, Xanana hato’o.
Nia salienta katak jurnalizmu labele limita de’it ba publika notísia, maibé halo investigasaun, analiza kle’an no buka verdade kona-ba asuntu sira ne’ebé akontese.
“La’e ita sai jornál atu enxe de’it ho notísia. Ne’e duni karik atu hakarak lori Timór ba mundu hanesan ita-boot sira temi, informasaun ho análize, investigasaun, buka verdade mosu ne’e oinsá, tenke aprezenta”, nia sujere.
Xefe Governu mós enkoraja ekipa editoriál Tatoli atu kontinua prepara reportajen kona-ba asuntu importante sitra, ho análize kle’an no kontribui ba koñesimentu públiku.
“Imi prepara-an, iha ne’e temi sentru formasaun, imi loroloron [públika informasaun] ne’e di’ak liután, halo editoriál karik tenke sai editoriál ida kona-ba asuntu ida no ida seluk fali prepara-an ba asuntu oioin, ne’ebé sira ne’ebé sénior ona prepara sira hodi fó hanoin, ho análize di’ak. Ida-ne’e mak importante tebes ba imi-nia kualifikasaun no ema bele apresia duni. Imi la fó de’it informasaun, maibé imi fó haree ba situasaun, tau situasaun ne’e iha imi-nia website”, nia rekomenda.
Xanana mós husu ba Tatoli atu dezenvolve jornalista sira ho espesializasaun iha área ekonomia, polítika no seguransa, atu halo investigasaun kle’an no la depende de’it ba informasaun ne’ebé sirkula iha mídia sosiál.
Tuir Xanana, dezenvolvimentu teknolójiku no mídia sosiál lori benefísiu, maibé mós lori risku boot ba propagasaun informasaun laloos.
Nia refere katak Timor-Leste mós temi iha relatóriu Nasaun Unida kona-ba kazu online scam, ne’ebé presiza investigasaun jornalístika atu hatene loloos faktu sira.
Xefe Ezekutivu hatutan katak atu fó kredibilidade ba Tatoli, maka labele publika notísia hanesan de’it ho mídia seluk, tanba sira mós publika ona, nune’e Tatoli tenke diferente liuhusi publikasaun investigasaun no análize.
“Ida-ne’e mak ha’u husu iha dekada ida-ne’e, imi haree saida mak falta no la di’ak aumenta nafatin, hodi ema buka Tatoli. La’e ema ne’ebé buka de’it mak krítika no krítika de’it, soran ba soran, mai iha mídia sosiál”, nia realsa.
Hodi husu atu kontinua fó informasaun, tanba mídia iha papél importante atu fó sai informasaun ba povu atu partisipa di’ak liután iha prosesu dezenvolvimentu país.
“Tatoli, parabéns ba imi, prepara-an ba dekada foun ne’e”, nia hato’o.
Xefe Governu husu ba mídia estatál ne’e atu kontinua matein imparsialidade no kredibilidade iha publikasaun informasaunm no halo mós análize kona-ba dezenvolvimentu iha rejiaun, mundu, inklui ASEAN, atu povu bele akompaña no komprende mudansa sira ne’ebé akontese. “Ita lalika kompara ita-nia an, tanba ita rai foun ida foin tinan 24”, nia dehan.
Jornalista: Nelson de Sousa
Editora: Maria Auxiliadora
