Selebrasaun Semana Matak ho kuda ai-kameli iha Palásiu Nobre
DILI, 05 Agostu 2026 (TATOLI)—Prezidénsia Repúblika no Sekretaria Estadu Floresta selebra Semana Matak no eventu Maratona Internasionál Dili (DIM, sigla inglés) ho kuda ai-kameli iha resintu Palásiu Nobre, Lahane, Dili.
Sekretáriu Estadu Floresta, Fernandinho Vieira, hatete atividade Semana Matak ida-ne’e inisia husi Prezidente Repúblika, José Ramos-Horta, no apoiu husi Primeiru-Ministru, Xanana Gusmão, ne’ebé introdús iha DIM ba iha programa ida Semana Matak.
“Atividade ne’ebé ohin ita hala’o ne’e, ita kuda ai-kameli. Ida-ne’e hanesan kompromisu polítika Nonu Governu nian oinsá nafatin promove sándalu iha ita-nia rai, no hasa’e konxiénsia ita-nia komunidade lokál sira moris iha área rurál atu nafatin proteje no konserva ita-nia ai-kameli, nomós ita-nia área floresta iha territóriu”, Fernandinho Vieira hateten.
kuda ai horis iha Palacio Nobre lahane atu promove floresta no balada fuik sira, Dili (6/8/2026).Foto TATOLI/Antonio Daciparu
Nia dehan totál ai-kameli ne’ebé kuda iha resintu Palásiu Nobre Lahane ne’e hamutuk 20 pés. Liuhusi atividade sira ne’e atleta sira ne’ebé mai husi nasaun 30-resin haree katak Timor-Leste hadomi natureza.
“Ida-ne’e kompromisu ida ne’ebé ita hatudu ba ita-nia atleta nomós mundu katak ita hadomi natureza no armonia ho natureza, nune’e bele prevene problema mudansa klimátika ne’ebé [akontese] iha rai-laran”, dehan.
Ai-kameli ne’ebé kuda iha Palásiu Nobre Lahane ne’e sei kuída husi funsionáriu floresta ne’ebé deskata iha área ne’ebá. “Ita mós sei kuda tan ai-horis hanesan rambutaun, salak no durian, nune’e tinan lima ka sanulu mai ai-fuan sira ne’e bele fó fuan ita bele han”, nia informa.
kuda ai horis iha Palacio Nobre lahane atu promove floresta no balada fuik sira, Dili (6/8/2026).Foto TATOLI/Antonio Daciparu
Iha semana ne’e, Sekretaria Estadu Floresta, liuhusi Diresaun-Jerál Floresta prepara ona ai-oan hamutuk rihun 2 no sei fahe ba komunidade iha kapitál Dili, nomós iha munisípiu hodi kuda iha idaidak nia kintál. Ai-oan sira ne’ebé sei fahe ne’e ba ai konservasaun no ai-protesaun nian, inklui ai-urbana nomós ai-fuan sira.
“Mensajen ba Maratona Internasionál Dili, liuliu iha Semana Matak ne’e oinsá liuhusi eventu sira ne’e ita nafatin hasa’e konxiénsia komunidade atu dezenvolve área floresta iha Timor-Leste. Tanba atu dezenvolve ne’e presiza evolvimentu no partisipasaun ema hotu nian mak bele dezenvolve setór floresta ne’e ba oin”, nia konklui.
Jornalista: Arminda Fonseca
Editora: Maria Auxiliadora
