Semana Matak, Ministru Marcos husu ema hotu kuda ai-oan hodi proteje biodiversidade

DILI, 06 Agostu 2026 (TATOLI)—Ministru Agrikultura Pekuária Peska no Floresta, Marcos da Cruz, husu ba povu tomak mai hamutuk ho Governu iha semana matak ne’e hodi proteje natureza, ai-laran sira no nia biodiversidade (manu fuik no seluk tan) tamba ai-laran ne’e konsidera hanesan ekosistema ne’ebé bele fó moris ba ema hanesan oxigéniu, bee, malirin, Mahon no habokur rai.

“Husu ba ita hotu atu tenke servisu hamutuk hodi konserva ita-nia biodiversidade,” Ministru Agrikultura, Marcos da Cruz, hateten ba Agência Tatoli iha Palásiu Governu, ohin.

Governante ne’e dehan, iha ámbitu atividade Dili Internasionál Maratona ne’e Governu realiza programa kuda ai-kameli iha Palásiu Nobre Lahane, tanba ai-kameli hanesan “Icon” Timor-Leste nian ne’ebé uluk konvida ema husi nasaun Europa mai halo esplorasaun.

“Iha ámbitu DIM fó lembra fali importánsia no promove ai-kameli, viveiru ai-kameli ne’e ita rai iha munisípiu hotu. La’ós de’it ai-kameli maibé mós ai-horis sira seluk ne’ebé fó moris ba ita ema no balada fuik sira,” nia informa.

Nia hatutan, kona-ba protesaun floresta no animál fuik sira-ne’e la presiza halo iha loron nasionál sira, maibé ne’e polítika Governu ne’ebé halo ho diariamente no kontinua hanesan presiza kuda ai-horis iha área degradasaun no ida seluk mak proteje ai-horis sira-ne’ebé ezistente ona (moris nanis ona).

“Ita labele tesi ai arbiru, sunu rai arbiru, tenke halo to’os no natar iha rai tetuk tanba ho ida-ne’e ita bele kontribui ba protesaun ambiente,” nia apela.

Jornalista : Alexandra da Costa

Editór       : Cancio Ximenes