Gabinete Ministru Defeza klarifika Ministru Pedro Klamar Fuik nia kondisaun saúde
DILI, 05 Agostu 2026 (TATOLI)—Gabinete Mistru Defeza, iha Kuarta ne’e, klarifika ba públiku kona-ba Ministru Defeza, Kontra Almirante Donaciano do Rosário da Costa Gomes ‘Pedro Klamar Fuik’ nia kondisaun saúde.
Iha biban ne’e, rejeita mós publikasaun husi pájina ida iha Facebook, ne’ebé dehan Ministru nia kondisaun saúde krítiku ona no husu atu públiku bele hasa’e orasaun hodi bele hetan rekuperasaun.
“Husi Gabinete Ministru Defeza nian hakarak informa ba públiku katak, Ministru Defeza daudaun ne’e ho kondisaun moras hela, maibé la’ós hanesan saida mak pájina ‘Matan Demokrasia’ nian haktuir, katak Ministru Defeza nia kondisaun saúde krítiku. Tanba ne’e, husu ho hakraik-an ba ita hotu atu labele halo propaganda ba Ministru Defeza nia saúde,” referidu nota husi Gabinete Ministru Defeza, ne’ebé Ajénsia TATOLI asesu.
Notísia relevante : Ministru Defeza aprezenta projetu konstrusaun Ospitál Militár F-FDTL ba Konsellu Ministru
Gabinete Ministru Defeza iha biban ne’e agradese mós ba parte hotu nia orasaun no deseju rekuperasaun ba Ministru.
“Ami fiar katak ita-boot sira-nia mensajen no apoiu morál bele ajuda ita-nia Maun Adano rekupera fali husi ninia moras hodi hala’o fali serbisu hanesan baibain. Obrigadu barak,” Gabinete fó-sai.
Jornalista : Natalino Costa
Editora : Julia Chatarina
