DILI, 10 Setembru 2025 (TATOLI)–Arsebispu Metropolitana Dili, Don Virgílio Kardeál do Carmo da Silva, SDB, hasa’e orasaun ba Maktoban Papa Francisco iha lelehan atu kontinua harohan mai timoroan sira hodi moris iha dame, unidade no fraternidade atubele haburas valór evanjellu nian tuir kultura no fiar ne’ebé iha ba Jezús Kristu nune’e sai sasin iha kontinente Ázia.
Don Virgílio Kardeál hasa’e orasaun referida liuhosi misa asaun ba grasa ba vizita tinan-ida Papa Francisco iha Timor-Leste, iha Tasi-Tolu, Dili, Kuarta ne’e.
“Obrigadu ba legadu hotu ne’ebé Papa Francisco husik hela mai ami, ba kreda no Mundu,” Don Virgílio Kardeál hateten.
Notísia relevante: Don Virgílio Kardeál konsidera Papa na’in-rua nia vizita halo Tasi-Tolu sai fatin istóriku
Bispu Dioseze Dili relata prezensa Papa Francisco hatudu ona esperansa loos nian ba timoroan hodi hatuur iha fuan di’ak pastór no konsidera durante Papa Francisco moris hala’o misaun nu’udár líder kreda ne’ebé fuan boot hodi preokupa ba situasaun mundu nian hanesan funu, terus, hamlaha, diskriminasaun no nafatin hadame justisa sosiál ba fraternidade.
Vizita Papa Francisco iha Timor-Leste hatudu atensaun ba rai Timor hodi hatudu katak iha Papa nia fuan nu’udár perferia ba sentru misaun bainhira mundu falta figura, Papa Francisco mosu nu’udár aman ida-ne’ebé domin-na’in hodi hatudu no hanorin kona-ba mizerikórdia.
“Nu’udár aman, Papa Francisco nia preokupasaun no atensaun pastorál ba ema moras, kbiit laek, terus no mazernidade sira,” nia haktuir.
Entretantu, hafoin vizita pastorál iha Timor-Leste iha Setembru 2024, Papa Francisco husik hela mundu iha loron-21 Abríl tinan-ne’e ho idade 88, iha-ne’ebé haloot iha Bazilika Santa Maria Maggiore, tuir pedidu Maktoban Papa Francisco.
Jornalista: Natalino Belo
Editór: Xisto Freitas da Piedade
