DILI, 14 Jullu 2026 (TATOLI)—Autoridade Inspesaun Fiskalizasaun Atividade Ekonómika no Sanitária Alimentár (AIFAESA) taka provizóriu ba Empreza Gacor ne’ebé prodús pentolan (naan-kabuar) iha área Bebora, Suku Motael, Postu Administrativu Vera Kruz, Munisípiu Dili.
Hafoin informasaun ne’e públika iha mídia sosiál, AIFAESA liuhusi Xefe Tékniku ekipa Inspesaun, Virato Paulo, hamutuk ho ekipa tun direta ba terrenu hodi halo inspesaun ba fatin produsaun pentolan no deteta katak fatin produsaun refere ladun ijiéne no sei fó impaktu ba ema-nia saúde.
“Tanba ne’e mak ohin ami ho ekipa tun direta mai iha fatin produsaun pentolan nian ne’e observa katak fatin produsaun ladun ijiéne, foer nakonu, labadaeniha fatin produsaun, mákina prodús no dulas naan mós foer. Membru sira la uza atributu protesaun (luvas, ambentál nst), kuazé ambiente ladun ijiéne. Signifika la prienxe kritéria, entaun ita taka provizóriu fulan ida. Karik sira kumpre ona mak ita reativa fali,” xefe tékniku ne’e informa ba Jornalista sira iha nia kna’ar fatin, ohin.
Xefe tékniku ne’e mós hateten, depende ba empreza karik sira hadi’a fali fatin halo moos no halo reabilitasaun fatin produsaun nian, inklui renova dokumentu lisensa komersiál husi SERVE, I.P, entaun sira sei ba hato’o fali AIFAESA hodi ba halo observasaun katak sira prienxe ona rekezitu sira, entaun AIFAESA bele reativa fali atividade negósiu ida-ne’e.
“Inspesaun ida-ne’e ho objetivu atu garante produsaun ijiéne no garante ema hotu nia saúde, nune’e labele hetan moras oioin. Tanba ohin halo inspesaun ne’e deteta kompañia kuaze komete infrasaun grave entaun AIFAESA foti desizaun taka provizóriu fulan ida hodi fó hanoin ba kompañia atu hadia sira-nia fatin produsaun,” nia dehan.
Aleinde ne’e, tuir ekipa laboratorium AIFAESA, Floriana Azete, reforsa ohin ekipa mai halo inspesaun iha fatin produsaun identifika kompañia komete infrasaun no la prienxe kritéria ka latama iha fixa liuliu fatin produsaun ladun ijiéne.
Nia dehan, ekipamentu produsaun ladun ijiéne, membru sira la uza ekipamentu hanesan luvas, sapatu botas, xapeu taka ulun. Bainhira halo produsaun ka dulas naan uza mákina foer, bee torneira sulin arbiru ba rai nomós basia tau naa nian rai arbiru de’it.
“‘Entaun, ami konsidera katak produsaun refere komete infrasaun tanba la prienxe kritéria, entaun sira tenke troka ekipamentu produsaun no lixeu tenke tau iha lixeiru fatin,” nia rekomenda.
Enkuantu, nia informa, ko’alia kona-ba aplika koima ho orsamentu hirak ne’e superiór AIFAESA nian sei halo diskusaun hodi foti medida rigorozu bazeia ba infrasaun ne’ebé kompañia komete.
“Ami fó rekomendasaun ona ba kompañia-na’in no sira promete atu hadi’ak infrasaun ne’ebé sira komete, nune’e bele hetan autorizasaun hodi reativa fali sira-nia negósiu,” nia dehan.
Jornalista : Alexandra da Costa
Editór : Cancio Ximenes
