AILEU, 20 Jullu 2026 (TATOLI)—Primeiru-Ministru, Kay Rala Xanana Gusmão, Segunda ne’e, hatun despaisu hodi halo suspensaun permanente Prezidente Autoridade Munisipál Aileu, João Bosco dos Santos, tanba konsidera komete violasaun grave ne’ebé kobre aspetu dixiplinár, étiku no kriminál, no hahalok sira-ne’e inklui asédiu seksuál hasoru vítima AMA.
Desizaun husi Primeiru-Ministru Xanana ne’e akontese bazeia ba rezultadu inkéritu husi Gabinete Inspesaun Jerál no Auditória Ministériu Administrasaun Estatál (MAE)’
Tuir dokumentu ne’ebé Agência Tatoli asesu ho númeru referénsia 471/M-MAE/VII/2026 ne’e haktuir katak Primeiru-Ministru, Xanana Gusmão, oriente atu halo suspensaun permanente ba Prezidenre Autoridade Munisipál Aileu, João Bosco dos Santos, ho prazu loron 30 ba kandidatu foun no hatama hikas vítima AMA ba servisu.
Desizaun husi Governu ne’e liuhusi Gabinete Inspesaun Jerál ne’e deskreve iha karta despaisu ne’ebé públika husi Ministériu Administrasaun Estatál no hetan karimbu husi Gabinete Primeiru-Ministru iha loron 20 fulan-Jullu 2026.
Iha despaisu ne’e, Ministru Administrasaun Estatál Tomas Cabral deklara iha onra atu hateten ba Primeiru-Ministru katak tuir notísia sira-ne’ebé fó sai liuhusi órgaun komunikasaun sosiál no mídia sosiál kona-ba Prezidente Autoridade Munisipál Aileu, nia determina ona atu loke inkéritu ida hodi halo apuramentu kona-ba loos ka lae akuzasaun sira-ne’ebé atribui ba PAM Aileu.
Inkéritu refere hala’o husi Gabinete Inspesaun-Jerál no Auditória Ministériu Administrasaun Estadu, tuir kompeténsia legál sira-ne’ebé atribui ba gabinete refere.
Ministru Administrasaun Estatal, Tomás do Rosário Cabral mós iha onra atu hateten ba Xefe Governu katak, iha ohin dadeer (20/07), Inspetór-Jerál Administrasaun Estadu aprezenta ba nia relatóriu finál kona-ba inkéritu ne’ebé hala’o ona hasoru PAM Aileu.
Nune’e husi konkluzaun sira-ne’ebé hakerek iha relatóriu refere, balub ne’ebé importante liu mak hanesan tuir mai:
“Señor João Bosco dos Santos, nu’udar Prezidente Autoridade Munisipiu Aileu (PAM Aileu), komete violasaun grave ne’ebé kobre aspetu dixiplinár, étiku no kriminál, hahalok sira ne’e inklui asédiu seksuál,” Tomas Cabral hateten liuhusi dokumentu refere.
Enkuantu iha loron 17 fulan-Jullu 2026 ne’e, MAE hasai despaisu kona-ba determinasaun ba medida kautelár sira durante prosesu inquéritu ne’ebé sei la’o hela ka investigasaun husi Gabinete Inspesaun-Jerál no Auditória Ministériu Administrasaun Estadu.
Jornalista : Alexandra da Costa
Editór : Cancio Ximenes
