Governu aprova enkuadramentu Orsamentu Jerál Estadu no Jestaun Finanseira Públika
DILI, 05 Agostu 2026 (TATOLI)—Governu liuhusi reuniaun Konsellu Ministru, kuarta ne’e, aprova proposta husi Vise-Ministra Finansa, Regina de Jesus, kona-ba alterasaun dahuluk ba Dekretu-Lei númeru 42/2025, 15 Dezembru, ne’ebé regulamenta Lei númeru 3/2025, 23 Abríl, kona-ba “Enkuadramentu Orsamentu Jerál Estadu no Jestaun Finanseira Públika”.
Alterasaun ne’e introdús fleksibilidade boot-liu iha ezekusaun Orsamentu Jerál Estadu, hodi permite katak libertasaun verba destinada ba kapitál dezenvolvimentu husi servisu no entidade Setór Públiku Administrativu bele halo to’o totál dotasaun orsamentál orijinál to’o finál semestre dahuluk iha tinan ida-idak.
Sekretáriu Estadu Komunikasaun Sosiál, Expedito Loro Di’as Ximenes, hateten Konsellu Ministru mós aprova dekretu-lei ida-ne’ebé aprezenta husi Vise-Ministra Finansa kona-ba enkuadramentu jestaun orsamentu finnseira.
“Iha inteodusaun Vise-Ministra dehan atu flexibilidade barak liu ba ezekusaun liuliu bele fó libertasaun ba verba kapitál jeneralmente servisu entidade setór públiku,” Governante ne’e informa ba jornalista sira iha nia kna’ar fatin Palásiu Governu, ohin.
Medida ne’e ho objetivu atu asegura ezekusaun lalais no efisiente liu ba projetu investimentu públiku, hamenus difikuldade administrativa no fasilita konkretizasaun prioridade governamentál tuir tempu.
Diploma ne’e mós halo armonizasaun rejime regulamentár ho alterasaun sira-ne’ebé introdús husi Lei númeru 8/2026, 08 Juñu, ne’ebé reforsa fleksibilidade jestaun orsamentál.
Iha ámbitu ne’e, reflete mós posibilidade atu halo alterasaun orsamentál no transferénsia verba entre programa oioin Fundu Infraestrutura, tuir previzaun iha Lei Enkuadramentu Orsamentu Jerál Estadu no Jestaun Finanseira Públika.
Nune’e ho revizaun enkuadramentu regulamentár ne’e, Governu reforsa mekanizmu jestaun finanseira públika, hodi promove utilizasaun rekursu públiku sira-ne’ebé efisiente liu no asegura kapasidade ezekusaun fízika no finanseira boot liu ba projetu estratéjiku kapitál dezenvolvimentu, tuir kuadru legál ne’ebé vigora.
Jornalista : Alexandra da Costa
Editór : Cancio Ximenes
