DILI, 24 Setembru 2025 (TATOLI)- Prezidente Parlamentu Nasionál (PPN), Maria Fernanda Lay, destaka kooperasaun ho Malázia iha área komérsiu, edukasaun, teknolojia, luta hasoru mudansa klimátika, no diálogu parlamentár.
Líder másimu órgaun soberania daruak hato’o iha marjen sesaun solene ba okaziaun vizita ofisiál Primeiru-Ministru Malázia, Dato Seri Anwar Ibrahim, iha Timor-Leste.
Nia dehan relasaun entre país rua dezde luta ba independénsia. Malázia sai ona parseiru ne’ebé metin hodi apoia Timor-Leste iha área edukasaun, fornese asisténsia médika, asisténsia téknika no kapasitasaun. Hodi destaka mós atu hametin reforsu kooperasaun iha dimensaun oioin iha futuru.
“Haforsa relasaun komérsiu ne’ebé reflete poténsia loloos komérsiu iha ASEAN laran, iha edukasaun ne’ebé prepara ita-nia foinsa’e sira ba lideransa iha sudeste aziátiku. Diálogu parlamentár ne’ebé reforsa instituisaun demokrátika sira, kolaborasaun iha teknolojia sustentavel ne’ebé tau ita-nia rejiaun nu’udar líder iha kombate mudansa klimátika”, nia hato’o.
Nia salienta katak dezafiu sira ne’ebé hasoru mak mudansa klimátika, dezigualdade ekonómika, preokupasaun seguransa rejionál – hotu-hotu ezije atensaun.
“Maski nune’e ha’u fiar katak ho parseiru sira hanesan Malázia no líder ita-nia [PM Malázia] no ASEAN sei sai forte no unidade liután”, dehan.
Fernanda Lay ho orgullu no agradese vizita Xefe Governu Malázia nian ho amizade. Ho sesaun solene ne’e marku istóriku hametin ligasaun entre nasaun rua.
Nia agradese ba apoiu Malázia ba Timor-Leste nia adezaun ba Asosiasaun Nasaun Sudeste Aziátiku.
Notísia relevante: Vizita PM Malázia hametin parseria no afirmasaun apoiu integrasaun ba ASEAN
Jornalista: Nelson de Sousa
Editora: Maria Auxiliadora
