v
DILI, 22 Setembru 2025 (TATOLI)–Emprezariu timoroan no na’in ba Aero Dili, Lourenço de Oliveira, hateten adezaun Timor-Leste ba ASEAN importante no iha vantajen ba Timor-Leste.
Notísia Relevante:
“Hanoin ita tama ba ASEAN ne’e ha’u haree hanesan di’ak-liu ba ita. Ita tama ba ASEAN vantajen barak ba Timor-Leste,” Emprezariu timoroan ne’e hateten ba jornalista sira iha Palásiu Prezidensiál Nicolau Lobato, Bairru Pite, segunda ne’e.
Nia dehan, bainhira Timor-Leste tama ona hanesan membru Plenu ASEAN mak oportunidade barak ba ema hotu atu hetan servisu.
“Tama ona ba ASEAN ne’e, iha ona oportunidade barak ba ita atu hetan servisu, ita atu halo negósiu, ida-ne’e vantajen di’ak ba ita,” nia dehan.
Tanba ne’e, nia husu mós ba Governu atu investe maka’as iha setór produtivu sira hodi hasa’e ekonomia Timor-Leste nian no tau matan mós ba empreza kiik sira.
Antes ne’e, iha 29 Maiu, Governu liuhusi reuniaun Konsellu Ministru aprova projetu Rezolusaun Governu, ne’ebé aprezenta husi Vise-Ministra ba Asuntu ASEAN, Milena Maria da Costa Rangel, ne’ebé estabelese kriasaun grupu traballu interministeriál ida-ne’ebé responsável ba implementasaun rekomendasaun ne’ebé hatuur iha Deklarasaun Prezidénsia ASEAN nian, ne’ebé emite iha Simeira ASEAN ba da-46.
Ida-me’e ho objetivu atu konklui prosedimentu formál sira-ne’ebé nesesáriu, nune’e mós aselera negosiasaun sira kona-ba akordu ekonómiku prinsipál sira-Oe’ebé nesesáriu ba prosesu adezaun plena Timor-Leste nian ba organizasaun ne’e, ne’ebé tuir planu sei hala’o iha fulan-outubru 2025.
ASEAN aseita TL sai membru plenu
Durante Simeira ASEAN bá dala-46 iha Kuala lumpur Malázia líder hotu-hotu fó apoiu tomak ba Timor-Leste atu bele adere ba ASEAN ne’ebé nu’udár forum importante, hodi ko’alia kona-bá situasaun hotu-hotu ne’ebé akontese iha mundu.
Maibé Timor-Leste nia adezaun ba membru plenu ASEAN sei ofisializa iha simeira ASEAN ba da-47 ne’ebé sei realiza iha fulan-Outubru mai ne’e iha Malázia.
Jornalista : Hortencio Sanchez
Editór : Cancio Ximenes
