DILI, 23 Setembru 2025 (TATOLI)—Ministru Asuntu Kombatente Libertasaun Nasionál (MAKLN-sigla portugeza), Gil da Costa Monteiro “Oan-Soru” relata Fundu Kontributivu Kombatente Libertasaun Nasionál to’o agora hamutuk millaun $56-resin.
“Kada fulan kombatente kontribui $30. Hosi kada veteranu ho kuantidade 27.629 ho kategoria 8 a 14 to’o 20 a 24 nian hahú hosi tinan 2020 mai to’o ohin ne’e, atinje ona millaun $56-resin ($56.265.909,86),” Oan Soru dehan ba jornalista sira iha Salaun Maubai, Komoro, Dili, Tersa ne’e.
Notísia relevante: Fundu kontributivu veteranu millaun $34 iha konta veteranu
Oan Soru dehan osan ne’e ko’a bazeia ba pedidu Kombatente Libertasaun Nasionál mai iha MAKLN no Ministériu enkamiña bá Ministériu Finansa (MF) atu retein osan $30 kada ema automatikamente ba konta CCLN, Dekretu-Lei númeru 13/2022, 30 Marsu, ne’ebé promulga hosi Prezidente Repúblika sesante, Francisco Guterres “Lú Olo”.
“Tanba ne’e, agora ha’u reafirma tan katak programa ko’a osan $30 ne’e iha legalidade. Liuhosi dekretu-lei númeru 13/2022 fó kompeténsia ba CCLN hodi responsabilidade ba fundu ida-ne’e,” nia tenik.
Jornalista: Osória Marques
Editór: Xisto Freitas da Piedade
