COVALIMA, 31 maiu 2023 (TATOLI)–Prezidente Konsellu Veteranu Kombatente Livertasaun Nasionál (CCLN), Vidal de Jesus “Riak Leman”, hateten Governu esklarese ba veteranu iha Covalima kona-ba andamentu fundu kontributivu ne’ebé kada fulan ko’a $30 ne’e, ho totál fundu hamutuk millaun $34 mak iha konta fundu veteranu.
Notísia Relevante: Riak Leman: Fundu kontributivu kombatente millaun $27,6 iha konta fundu veteranu
“Ha’u mai iha Munisípiu Covalima atu esklarese dezenvolvolvimentu ka andamentu fundu kontributivu veteranu nian ne’ebé ko’a sira-nia osan kada fulan $30 hahú hosi janeiru 2020 to’o ohin loron ne’e ho totál fundu hamutuk millaun $34,” Prezidente Konsellu Veteranu Kombatente Livertasaun Nasionál (CCLN), Vidal de Jesus “Riak Leman”, hateten ba Agência Tatoli iha salaun Mama Resto, Covalima, tersa ne’e.
Razaun konsellu Veteranu halo esklaresementu fundu kontributivu veteranu nian ne’ebé mak durante ne’e ko’a sira-nia osan, tanba veteranu barak mak sei iha dúvida kona-ba ko’a veteranu nia osan hahú 2020 to’o ohin loron ne’ e, lori atu halo saida lerek.
Ho nune’e, Konsellu Veteranu iha obrigasaun presiza halo esklararesimentu atu veteran sira bele iha koñesimentu kona-ba fundu ne’ebé mak durante ne’e Governu ko’a sira-nia osan kada fulan no bainhira mak atu termina.
Fundu veteranu ne’ebé durante ko’a ne’e, nia dehan, Konsellu Veteranu rai iha Banku Nasionál Komérsiu Timor-Leste (BNCTL), BRI no banku Mandiri, nune’e Konsellu Vetranu realiza reuniaun hodi halo estudu no sei halo planu, tanba kompañia Internasionál hosi Austrália atu halo investimentu.
“Molok atu halo investimentu maibé ita-nia rai tenke nune’e, konsellu sosa rai ektare 12 ne’ebé ektare 10 iha Tibar, ektare rua iha Manleuana atu halo investimentu, kompaña balun mai atu loke alfaiate hodi kria kampu traballu iha Timor-Leste,” nia hateten.
Aleinde kompañia hosi Austrália loke alfaiate, kompañia Austrália balun mós foku lori karau mai iha Timor atu esporta ba Malázia, Singapura no Indonézia.
“Ita hetan ona merkadu, ita mós bele haki’ak karau hanesan iha Covalima, Manufahi, mesak rai tetuk entaun bele fó prióridade atu bele haki’ak karau,” nia dehan.
Tuir planu, bainhira kada fulan ka’o veteranu nia osan atinje ona millaun $100 fmak foin halo mudansa hodi ko’a valór osan hosi $30.00 ne’e bele tun ba $10 ka $5, maibé kontinua ko’a veteranu nia osan kada fulan.
Prezidente Konsellu Veteranu Munisípiu Covalima, Osorio Soares “Mausoko”, hateten nia parte aseita bainhira Governu ko’a veteranu nia osan kada fulan $30.00, nune’e veteranu sira hein de’it desizaun hosi Konsellu Veteranu kontinua atu ka’o ka oinsá, maibé di’akliu kontinua ko’a tanba fó benefísiu ba veteranu sira.
“Ha’u hakarak kontinua ko’a veteranu nia osan kada fulan, tanba fó benefísiu. Nune’e, veteranu sira bele kréditu hodi konstrui sira-nia uma no hodi selu oan sira-nia eskola,” nia hateten.
Tuir dadus, Konsellu Munisipál Nasionál Livertasaun Nasionál Munisípiu Covalima rejista ona veteranu no martires hosi postu administrativu hitu iha munisípiu Covalima ne’e hamutuk ema 2000-resin.
Jornalista : Celestina Teles
Editór : Cancio Ximenes
