DILI, 26 setembru 2022 (TATOLI)–Prezidente Konsellu Veteranu Libertasaun Nasionál (CCLN-sigla portugés), Vidal de Jesus “Riak Leman”, informa fundu kontributivu veteranu no kombatente nasionál ne’ebé kada fulan ko’a $30 hosi veteranu sira, to’o agora hamutuk millaun $27,6 iha konta fundu veteranu nian.
Notísia Relevante: Fundu kontributivu kombatente millaun $25 iha konta fundu veteranu
“Fundu kontributivu veteranu nian to’o agora hamutuk $27,600,308,077 ho nia lukru hamutuk $547,197,029,” Vidal de jesus “Riak Leman” hateten ba Agência Tatoli, via telefónika, segunda ne’e.
Ko’alia kona-ba investimentu to’o agora, Riak Leman dehan seidauk investe iha buat ida maibé CCLN plau kria kompañia ida atu bele rai osan no sai hanesan sede ida ba fundu kontribuitivu $30 kada fulan ba veteranu ida-idak nian.
“Atu investe tenke iha kompañia, nune’e ita bele liuhosi kompañia mak bele investe. Nune’e, ami kria ona kompañia ida depois kompleta ho nia estrutura rasik, seidauk rejistu kompañia ne’e. Tanba ne’e, ami sei hein hela uma ida hosi Dirasaun Loromonu nian, ne’ebé daudaun ne’e sei iha faze reabilitasaun,” nia dehan.
Tuir nia, iha kompañia ne’e mesak veteranu no veteranu nia oan de’it ne’ebé iha koñesimentu kona-ba finansa, tékniku, enjiñeiru no seluk tan mak bele halo kna’ar iha laran hodi nune’e bele halo servisu ho di’ak no susesu.
Husu kona-ba investimentu osan ne’e, nia dehan, Konsellu Veteranu Libertasaun Nasionál (CCLN-sigla portugés) prefere sei investe iha área ne’ebé mak produtivu.
“Ami prefere liu ba área produtiva, entaun ami hakarak no hanoin atu investe iha ne’ebá. Tanba ami hakarak osan ne’e prodús lalais no iha lukru lalais,” nia dehan.
Benefisiáriu ba fundu ne’e hamutuk na’in-27.828 no fundu kontributivu veteranu nian ne’e implementa hahú iha janeiru 2022.
Kriasaun fundu kontribuitivu veteranu nian ne’e, ninia baze legál iha aprovasaun dekretu-lei númeru 8/2020 6a alterasaun ba dekretu-lei númeru 15/2008 ba pensaun liuhosi Konsellu Ministru, promulgadu hosi Prezidente Repúblika iha 19 marsu 2020, hodi kria Gabinete Apoiu Programa Fundu Investimentu Veteranu Timor-Leste ne’ebé despaixu deside hosi númeru 01/MACLN-SEACLN/I/2020 tau matan ba fundu investimentu veteranu.
Jornalista : Osória Marques
Editór : Cancio Ximenes
