DILI, 08 jullu 2022 (TATOLI)—Prezidente Konsellu Kombatente Libertasaun Nasionál (CCLN), Vidal de Jesus “Riak Leman”, hateten fundu kontributivu veteranu ne’ebé fulan-fulan ko’a $30 ne’e agora daudaun hamutuk millaun $25 mak iha konta fundu veteranu nian.
Notísia Relevante: Fundu kontributivu veteranu hamutuk millaun $22 iha konta fundu veteranu
“To’o fulan-jullu ne’e, osan hamutuk miliaun $25 maibé ida-ne’e inklui ho nia funan,” Riak Leman hateten ba Agência TATOLI, iha nia knar fatin Caicoli, Dili, sesta ne’e.
Osan kontributivu veteranu miliaun $25 ne’e mai hosi benefisiáriu hamutuk 27.828, no hosi ema sira-ne’e, veteranu balun mak mate ona.
Maibé, nia dehan, veteranu na’in hira mak mate ne’e CCLN seidauk hatene, maibé se balun mate ona konserteja osan menus ona.
Governante ne’e hatutan, hosi ema 27.828 ne’e mesak veteranu ho grau 8-14, 15-19 no 20-24 nian no la inklui ho veteranu grau 0-3 ho 4-7.
Antes implementa polítika ne’e, Sekretáriu Estadu Kombatente Libertasaun Nasionál (SEAKLN) hala’o ona sensibilizasaun ba veteranu sira iha munisípiu sira hotu no iha nasionál ne’ebé sai benefisiáriu simu pensaun hosi Estadu hodi hetan aseitasaun ho ema 6.667.
Nune’e mós, liuhosi primeiru kongresu konsellu nasionál kombatente libertasaun nasionál aprova deliberasaun númeru 01 primeira kongresu CCLN iha loron 21 dezembru 2019, hodi fó kbiit ba SEACLN hahú implementa polítika kriasaun fundu investimentu ba veteranu.
Entretantu, antes ne’e, Prezidente Konsellu Kombatente Libertasaun Nasionál (CCLN), Vidal de Jesus ‘Reak Leman’, hateten partisipasaun veteranu nian iha oin rua, ida mak partisipasaun totál no partisipasaun tempu inteiru mak tama iha dedikasaun eskluziva ne’e hanesan nia iha baze apoiu, iha ne’ebá haree inimigu no buat seluk nia labele halo maibé inimigu kaer hatama kadeia.
“Ita haree veteranu ne’ebé dedika-aan iha klandestina to’o inimigu kaer tama kadeia ne’e, ita nafatin tau-matan no barak mak iha mudansa tanba hetan ona pensaun hosi Governu. Osan ne’ebé sira simu loke kioske hodi faan sasán nesesidade bázika. Ida-ne’e mak sira halo iha sira-nia moris loron-loron nian,” nia dehan.
Ida-ne’e bazea ba baze legál aprovasaun dekretu-lei númeru 8/2020 6ª alterasaun ba dekretu-lei númeru 15/2008 ba pensaun liuhosi Konsellu Ministru, promulgadu hosi Prezidente Repúblika iha 19 marsu 2020, hodi kria Gabinete Apoiu Programa Fundu Investimentu Veteranu Timor-Leste ne’ebé despaixu deside hosi númeru 01/MACLN-SEACLN/I/2020 tau matan ba fundu investimentu veteranu.
Programa fundu investimentu veteranu ne’e implemeta iha fulan janeru 2020 to’o agora no oras-ne’e osan ne’e investe iha banku rua (Banku Nasionál Komérsiu Timor-Leste no Bank republic Indonesia) ho montante $15.874.157,64 no fundu ida-ne’e reponsabiliza hosi CCLN.
Notísia Relevante: Governu integra veteranu iha vida ekonómika liuhosi pensaun-subsídiu
Jornalista : Osória Marques
Editór : Cnacio Ximenes
