DILI, 24 Setembru 2025 (TATOLI)–Primeiru-Ministru (PM), Kay Rala Xanana Gusmão konvoka enkontru bilaterál ho ninia omólogu malaiu, Anwar Ibrahim, ne’ebé iha biban ne’e parte rua konkorda atu hadi’a relasaun bilaterál iha setór oioin.
PM Xanana hateten, vizita ofisiál ne’e hanesan marka importante ida iha amizade entre nasaun rua, ne’ebé kontinua buras dezde estabelese relasaun diplomátika iha tinan 2002.
“Ami-nia diskursu sira ohin maka laran-manas no produtivu, ami konkorda atu hadi’a liután ami-nia relasaun bilaterál sira iha setór oioin, inklui komérsiu no investimentu ba ensinu superiór, saúde, no turizmu,” PM Xanana informa ba Jornalista sira iha Palásiu Governu, Kuarta ne’e.
Xefe Governu dehan, kondisaun ne’e reflete konfiansa polítika ne’ebé maka’as no kompromisu ba envolvimentu kle’an liu.
“Ami rekoñese papél edukasaun no formasaun hodi prepara ami-nia foin-sa’e sira ba futuru hodi konkorda ho programa foun sira hansan bolsa estudu no parseria sira entre instituisaun sira,” nia akresenta.
Notísia relevante : PM Malázia reitera apoiu no elojia preparasaun TL atu sai membru ASEAN
PM Xanana afirma, konetividade entre nasaun rua hanesan prioridade a’as liu, hanensan servisu aéreu foun entre Kuala Lumpur no Dil hamutuk ho viajen lahó vistu ba ema Malázia sira neʼebé vizita Timor-Leste sei fasilita sidadaun sira atu halo viajen, serbisu hamutuk, no deskobre oportunidade iha ida-idak ninia rain. Inisiativa sira ne’e sei hametin turizmu, investimentu, no komprensaun kulturál.
Iha biban hanesan, Primeiru-Ministru Malázia, Anwar Ibrahim agradese ba ninia omólogu, ne’ebé durante vizita ne’e bele troka amizade no konfiansa.
“Relasaun ne’e esepsionál tebes bazeia ba konfiansa, bazeia ba apresiasaun ba ida-idak nia aspirasaun sira ba demokrasia, ba direitu umanu no ba bein-estar no moris di’ak husi ita-nia povu nian. Ami diskute mekanizmu sira atu iha investimentu sira iha komérsiu no turizmu iha edukasaun no saúde,” nia katak.
Anwar Ibrahim dehan, Malázia sei fahe saida de’it maka sira bele ajuda no iha área ne’ebé de’it tanba nasaun ne’e sei hetan benefísiu husi Timor-Leste nia esperiénsia no kompromisu ba reforma sira.
Jornalista : Alexandra da Costa
Editora : Julia Chatarina
