Top

PNTL rejista krime iha Postu Administrativu Dom Aleixo sa’e maka’as

Komandante PNTL Munisípiu Dili, Superintendente Xefe Polísia, Orlando Gomes. Imajen/TATOLI

DILI, 11 Setembru 2025 (TATOLI)—Polísia Nasionál Timor-Leste (PNTL) rejista krime iha Postu Administrativu Dom Aleixo sa’e maka’as.

“Iha munísipiu Dili, iha Postu Administrativu haat nune’e iha Eskuadra Polísia haat mak eziste iha munisipiu Dili, maibé iha Eskuadra Dom Alaixo normalmente kazu sempre sa’e maka’as,” Komandante PNTL Munisípiu Dili Superintendente Xefe Polísia Orlando Gomes hateten ba Jornalista sira iha nia knaar fatin, Eskuadra Dom Aleixo Ai-Mutin, Kinta ne’e.

Nia dehan, Polísia rejista kazu hamutuk 87 iha fulan-Agostu nia laran, ne’ebé husi kazu ne’e ida a’as liu mak ofensa integradu fízika simples, tuir fali mak violénsia doméstika no kazu seluk hanesan estragu sasán propriedade Estadu.

Iha loron 01 to’o 10 Setembru 2025, Eskudra Dom Aleixo rejista kazu totál 25 ho volume krime hahú sa’e.

“Husi fulan-Agostu to’o inísiu Setembru ne’e ita remete ona ba Ministériu Publiku (MP) kazu hamutuk 100-resin,” nia relata.

Notísia relevante : PNTL Vikeke rejista asidente tráfegu 14 durante fulan ualu

Komandante PNTL haktuir, kazu sira ne’e akontese tanba kauza husi ema Konsumu alkool no problema partikulár.

“Kazu sira akontese ne’e maioria ema hemu nune’e sempre halo desturbu iha tempu kalan, enkuantu kazu naok mos balun liga ho partikular tanba problema kona-ba rai no baliza,” nia katak.

Komandu PNTL hahú foti kedan medida atu nune’e halo patrullamentu ho karreta no la’o ain nune’e bele halo prevensaun.

“Ita buka halo prevensaun ba kazu sira ne’ebé mak akontese. Ita-nia sosializasaun ba eskola sira ne’ebé mak sempre mosu konflitu ne’e ita halo aprosimasaun beibeik ho estudante sira nomós liuhusi ita-nia Ofisiál Polísia Suku ba komunidade. Responsbilidade iha suku hamutuk ho Konsellu Polisiamentu Komunitária (KPK) atu nune’e bele halo prevensaun ba krime sira ne’ebé mak mosu,” nia katak.

Komandante Munisípiu Dili ne’e rekoñese katak rekursu umanu sai dezafiu atu halo prevensaun ba krime sira ne’e tanba ema hotu konsentra iha Dili.

“Ema barak rekursu Polísia limitadu autoridade seguransa labele kobre hotu-hotu. Kazu balun ita kobre, ita halo prevensaun balun derrepente akontese ne’e mak dalaruma barak liu, balun iha intensaun balun ho planu balun la ho planu derepente mosu,” nia tenik.

Jornalista     : Natalino Costa

Editora          : Julia Chatarina

Publisidade

Leave a Reply

Latest Post

error: Content is protected !!