Tinan ne’e, Autoridade Vikeke sei sosa karru funeráriu
VIKEKE, 24 Setembru 2025 (TATOLI)—Diretór Servisu Diresaun Munisipál Asaun Sosiál (SMAS) Munisípiu Vikeke, Octaviano Fernandes Salsinha informa, tinan ne’e (2025), Autoridade Munisipál Vikeke sei sosa karru funeráriu ida (1) hodi apoiu komunidade.
“Menus karru funeráriu sai dezafiu ida ba ami hodi responde ba komunidade nia pedidu tula mate-isin. Tan ne’e, ami aprezenta ba Prezidente Autoridade Munisípiu hodi deside sosa karru funeráriu,” Octaviano Fernandes Salsinha ba TATOLI iha Munisípiu Vikeke, Kuarta ne’e.
Diretór SMAS hatutan katak prosesu sosa karru funeráriu daudaun ne’e iha ona Diresaun Aprovizionamentu Munisípiu Vikeke no prosesu konkursu mós ramata ona, maibé sei hein loron sanulu tan tuir prosesu aprovizionamentu nian.
“Kona-ba kustu ami labele fó-sai ba públiku tanba sei iha aprovizionamentu,” nia dehan.
Octaviano esplika durante ne’e karru funeráriu iha rua de’it, nune’e labele responde komunidade nia ezijénsia ho másima.
Aleinde ne’e, tuir nia, kondisaun estrada iha postu sira hanesan Uatukarbau, Uatulari, Lakluta no Ossú difikulta karru funeráriu.
“Kondisaun estrada sira-ne’e halo karru funeráriu rua ne’e aat beibeik. Tan ne’e, ami haree kuandu estrada grave, karreta labele asesu, ita-nia komunidade pasiénsia tenke hulan de’it mate-isin,” nia subliña.
Hahú husi fulan-Janeiru to’o fulan-Setembru, karru funeráriu Munisípiu Vikeke apoia ona komunidade tula mate-isin hamutuk dala-91.
Jornalista: Vitorino Lopez da Costa
Editór: Xisto Freitas da Piedade
