Aban, PN diskute iha espesialidade projetu Lei Revoga Pensaun Mensál Vitalísia

September 25, 2025
05:37 PM
Facebook Instagram X WhatsApp Telegram

Reuniaun plenária Estraordinária ba diskusaun no votasaun iha jeneralidade ba Projetu Lei Seguransa Sosiál ba Titulár Órgaun Soberanu no Revoga Pensaun Vitalísia ba Deputadu no Eis Titulár ba Órgaun Soberania no providénsia seluk, iha sala plenária Parlamentu Nasionál, Kinta (25/09/2025. Imajen TATOLI/Francisco Sony

DILI, 25 Setembru 2025 (TATOLI) – Parlamentu Nasionál (PN) diskute, iha loron 26 Setembru, projetu lei númeru 11/VI (3a) Revoga Pensaun Mensál Vitalísia ba Deputadu no Eis-Titulár Órgaun Soberania no Providénsia sira seluk iha faze espesialidade.

Liuhusi reuniaun plenária estraordinária Parlamentu halo ona deliberasaun ho votu a favór 51, kontra no abstensaun 0, nune’e autoriza diskusaun espesialidade ne’e sei hala’o iha plenária.

“Vota pur unanimidade ba diskusaun [faze espesialidade] iha plenária”, Prezidente Parlamentu Nasionál, Maria Fernanda Lay, fó sai ohin.

Nune’e, meza fó prazu ba deputadu sira karik iha proposta atu armoniza projetu lei ne’e bele aprezenta to’o iha loron 25/09. “Tanba, demokratikamente ita hotu konkorda ho proposta númeru 11 [projetu lei númeru 11/VI (3a)]”, dehan.

Prezidente Komisaun A ba Asuntu Konstituisionál no Justisa, Patrocínio dos Reis Fernandes, konkorda katak diskusaun espesialidade hala’o iha plenária hodi públiku hotu akompaña, tanba ne’e asuntu interese nasionál. Husi parte bankada parlamentár sira seluk mós konkorda ideia ne’e.

Tuir rejimentu Parlamentu, diskusaun espesialidade sei foku espesífiku ba kada artigu.

Antes ne’e, Parlamentu Nasionál, aprova ho unanimidade projetu lei númeru 11/VI (3a) Revoga Pensaun Mensál Vitalísia ba Deputadu no Eis-Titulár Órgaun Soberania no Providénsia sira seluk iha faze jeneralidade ho votu a favór 61, kontra no abstensaun 0.

Projetu lei ne’e bankada Governu husi Partidu Kongresu Nasionál Rekonstrusaun Timorense (CNRT), Partidu Demokrátiku (PD) no opozisaun Kmanek Haburas Unidade Nasionál Timoroan (KHUNTO) mak aprezenta atu revoga Lei númeru 1/2007, 18 Janeiru, no Lei númeru 7/2007, 25 Jullu, altera husi lei númeru 7/2017 26 Abríl, ne’ebé estabelese Pensaun Vitalísia ho Regalia sira seluk ba Deputadu no Eis-Titulár Órgaun Soberania, ho efeitu retroativu. Projetu lei 11/VI (3a) iha artigu hamutuk hitu.

Notísiarelevante: https://tatoli.tl/2025/09/25/pn-aprova-ho-unanimidade-projetu-lei-revoga-pensaun-mensal-vitalisia-iha-jeneralidade/

Jornalista: Nelson de Sousa

Editora: Maria Auxiliadora