VIKEKE, 25 Setembru 2025 (TATOLI)—Autoridade Munisípiu Vikeke liuhusi Servisu Munisipál Apoiu Organizasaun Naun Govermentál no Organizasaun Komunitária, Kinta ne’e, realiza sorumutu armonizasaun ho parseiru dezenvolvimentu sira prinsipalmente organizasaun naun govermentál (ONG) sira iha Munisípiu Vikeke.
Objetivu husi sorumutu armonizasaun ne’e atu hametin relasaun entre autoridade munisipál no parseiru dezenvolvimentu ba implementasaun atividade sira iha Munisípiu Vikeke.
Prezidente Autoridade Munisípiu (PAM) Vikeke, Francisco Cruz Simões de Gonzaga Soares hateten sorumutu entre Autoridade Munisípiu Vikeke hamutuk ho parseiru dezenvolvimentu ONG sira-ne’e importante tebes tanba komunikasaun mak sai xave ba relasaun.
“Se ita laiha komunikasaun di’ak oinsá mak ita bele hatene malu. Tan ne’e, úniku xave mak presiza komunikasaun. Iha komunikasaun mak ita iha koordenasaun. Iha komunikasaun mak ita bele hatene ema seluk nia problema saida de’it mak enfrentadu. Husi komunikasaun ita bele trasa planu ida di’ak ba dezenvolvimentu ba ita-nia sosiedade iha Munisípiu Vikeke no liuhusi komunikasaun mak ita bele netraliza problema sira-ne’ebé mosu iha organizasaun ka instituisaun sira-ne’ebé eziste iha Vikeke,” Francisco hateten iha Postu Vikeke Vila.
Nia agradese ba parseiru dezenvolvimentu sira-ne’ebé organiza malu hodi realiza sorumutu armonizasaun ida-ne’e no nia prefere bá-oin tula-dikur ba malu tanba bainhira tula-dikur ba malu ema sei la sobu unidade.
Iha fatin hanesan, Diretór Servisu Munisipál Apoiu Organizasaun Naun Govermentál no Organizasaun Komunitária, Cosme Sarmento hateten sorumutu armonizasaun ne’e inisiativa husi Servisu Munisipál Apoiu Organizasaun Naun Govermentál no Organizasaun Komunitária tanba durante ne’e diresaun ne’e hamriik idak-idak la’o ninian, parseiru no autoridade ladún iha komunikasaun ida-ne’ebé di’ak.
“Tan ne’e, liuhusi sorumutu ida-ne’e ita koko halibur malu entre parseiru no diresaun munisipál hodi kria komunikasaun di’ak ho parseiru no Governu lokál nune’e ita la’o hamutuk liuliu atividade sira-ne’ebé parseiru sira implementa iha Munisípiu Vikeke. Parseiru sira-ne’e sai hanesan liman-ain Governu nian,” nia realsa.
Nia dehan, sorumutu armonizasaun ne’e sei hala’o iha kada trimestrá hodi aprezenta progrsesu no dezafiu sira-ne’ebé parseiru dezenvolvimentu sira implementa iha baze.
Iha sorumutu armonizasaun ne’e durante loron ida ne’e paritipa husi líder organizasaun hanesan Toos Ba Moris Di’ak (Tomak), Fundasaun Knua Haberan Komunidade (F-KHK), Krús Vermella Timor-Leste (CVTL-sigla portugeza), Adventist Development and Relief Agency (ADRA) no diretór munisipál sira.
Jornalista: Vitorino Lopez da Costa
Editór: Xisto Freitas da Piedade
