DILI, 25 Setembru 2025 (TATOLI)–Governu liuhusi Ministériu Turizmu no Ambiente (MTA) serbisu hamutuk ho Ministériu Koordenadór Asuntu Ekonómiku (MKAE) inklui Tradeinvest no International Finance Cooperation (IFC), Kinta ne’e, realiza Fórum Investimentu Turizmu ba daruak hodi promove setór privadu ne’ebé ligadu ho área turizmu inklui mós selebra loron mundiál turizmu nian.
Atividade ne’e realiza durante loron-tolu, hahú loron 25 to’o 27 Setembru. Inisiativa ne’e atu atua Timor-Leste nia beleza naturál, patrimóniu kulturál, no lokál estratéjiku ne’ebé oferese potensiál signifikativu nu’udar destinu turizmu ne’ebé sustentável.
Diretór Jerál Turizmu husi MTA, António da Silva hateten, objetivu loloos husi fórum ne’e maka hakarak hatene loloos kapasidade setór privadu, liuliu obstákulu ne’ebé durante ne’e hasoru, nune’e bele fahe informasaun ba malu hodi iha interrativu ne’ebé bele ajuda promove.
“Eventu ne’e halo preparasaun antes ona desde inísiu fulan-Jullu, kada tinan sempre realiza iha ámbitu komemorasaun loron mundiál turizmu ne’ebé monu iha loron 27 Setembru 2025 no sei envolve setór privadu sira hanesan restaurante, otél (akomodasaun), catring no seluk tan,” Diretór Jerál informa ba Ajénsia TATOLI, iha Sentru Konvensaun Dili (CCD, sigla portugés).
Notísia relevante : Governu preparadu realiza forum investimentu turizmu daruak promove singularidade TL
Sekuénsia atividade mak entidade Governu no parseiru dezenvolvimentu sei fahe esperénsia (master class) ne’ebé sei foka espesífika liu ba área turizmu.
“Estimasaun konvite ne’ebé ami fahe ba empreza lokál sira hodi partisipa iha fórum ne’e hamutuk 400-resin, ne’ebé sira sei mai hatudu sira-nia produtu artesanatu no produtu lokál iha mini feira ne’ebé komisaun organizadora prepara ona,” Diretór Jerál informa.
Aleinde ne’e, iha atividade ne’e sei iha oportunidade hodi fó prémiu apresiasaun turizmu ba otél no restaurante sira-ne’ebé ho kategoria di’ak. Ekipa responsável halo ona avaliasaun iha terrenu hodi identifika manán-na’in.
Fundu ba preparasaun no realizasaun fórum investimentu ne’e rasik akumula husi parte hotu ne’ebé realiza atividade ne’e.
Fórum ne’e sei halibur emprezáriu lokál, peritu internasionál sira, nomós parseiru dezenvolvimentu sira hodi hametin setór turizmu.
Fórum Investimentu Turizmu sei foka ba asuntu sira hanesan polítika no estratejia turizmu nian no rede investimentu turizmu nian. Iha sorin seluk, durante realizasaun fórum ne’e, sei iha mos diálogu ho setór privadu inklui iha mós sesaun klase mestradu kona-ba turizmu nian.
Objetivu husi fórum ne’e mak hodi fasilita rede negósiu, promove produtu no servisu turizmu lokál no fahe prátika ne’ebe di’ak liu hodi enkoraja investimentu.
Atividade ne’e hanesan oportunidade krusiál ida hodi hametin kooperasaun, atrai investimentu, no estabelese turizmu nu’udar pilar xave ba diversifikasaun ekonómika nasionál.
Jornalista : Alexandra da Costa
Editora : Julia Chatarina
