DILI, 25 setembru 2025 (TATOLI)–Portavós Estudante Universitáriu Timor-Leste (EUTL, Natalizio Nunes Martins, hateten, EUTL iha esperansa katak Parlamentu Nasionál (PN) bele aprova Revogasaun Lei Pensaun Mensál Vitalísia.
PN liuhusi reuniaun plenária iha Kinta ne’e, halo diskusaun no votasaun ba Projetu Lei nú.10/VI(3a) – Rejime Jurídiku Seguransa Sosiál ba Titulár Órgaun Soberania no Projetu Lei nú.11/VI(3a) – Revoga Pensaun Mensál Vitalísia ba Deputadu no Eis Titulár Órgaun Soberania no providénsia seluk (ho efeitu retroativu hahú husi 20 Maiu 2002 iha PN).
“Sim ita iha esperansa, tanba povu maioria mak ejize. Tanba ne’e, nu’udar reprezentante povu iha Parlamentu Nasionál tenke tau konsiderasaun ba povu nia hakarak. Ita iha esperansa tanba liuhusi asaun ne’ebé ita halo, bele obriga reprezentante povu atu deside tuir povu nia hakarak,” Portavós UETL hato’o ba Jornalista sira hafoin akompaña diskusaun no votasaun ba Projetu Lei nú.10 no 11, iha PN oin.
Estudante universitáriu ne’e nota, antes ne’e Deputadu no Deputada sira laiha vontade atu halo desizaun tuir povu nia hakarak no laiha vontade atu halakon Lei Pensaun Mensál Vitalísia.
“Entaun povu hambriik liuhusi EUTL atu obriga sira bele halakon Lei Pensaun Mensál Vitalísia. Ita laiha poder atu deside maibé ita iha poder liuhusi masa populár, liuhusi forsa populár atubele obriga sira deside tuir povu nia hakarak. Ida-ne’e mak ita-nia hakarak,” nia akresenta.
Natalizio dehan, sira-nia prezensa iha PN atu akompaña diskusaun sira ne’ebé daudaun la’o hela.
“Momentu asina akordu ho Parlamentu ne’e katak ita presiza akompaña diskusaun ne’e. Tanba ne’e mak liuhusi Portavós, ita iha obrigasaun atu mai asiste diskusaun ne’e no kamada sosiál seluk mós akompaña no estudante sira uza autonomia kampus bele akompaña prosesu ne’e,” nia katak.
Notísia relevante : Bankada lima no EUTL asina akordu halakon Lei Pensaun Vitalísia, 25 Setembru debate
Nune’e, nia husu ba Deputadu Parlamentu Nasionál atu fó votu a-favór ba proposta Revogasaun Lei Pensaun Vitalísia iha finál globál nune’e bele responde ona ba ezijénsia povu.
“Kuandu la halo tuir ezijénsia povu nian mak ita ho kamada sosiedade hotu atu kontinua halo manifestasaun,” Estudante universitáriu ne’e afirma.
Durante diskusaun no votasaun iha faze jeneralidade ne’e, estudante universitáriu sira nakonu iha Parlamentu oin hodi akompaña transmisaun direita no iha tempu hanesan membru Poliai Nasionál Timor-Leste (PNTL) asegura resintu Parlamentu no akompaña estudante universitáriu nia asaun sira.
Antes ne’e, UETL organiza manifestasaun hasoru PN durante loron-tolu (15-17 Setembru) ho ezijénsia haat hanesan, husu ba Parlamentu atu kansela no hapara sosa karreta luxu ba membru sira, halakon Lei Pensaun Vitalísia, alterasaun ba Lei Liberdade Reuniaun no Manifestasuan no alokasaun Orsamentu Jerál Estadu (OJE) ho pursentu boot ba setór produtivu no infraestrutura iha baze.
Manifestante sira kompostu husi UETL ne’ebé mai husi Universidade Nasionál Timor-Leste (UNTL), Universidade Dili (UNDIL), Universidade Orientál Timor-Leste (UNITAL) no Universidade da Paz (UNPAZ) hamutuk ho ativista, grupu sosiedade sivil inklui komunidade balun, ne’ebé konsentra hotu ona iha resintu UNTL laran hodi hahú manifestasaun.
Husi asaun ne’e konsege kansela prosesu aprovizionamentu sosa karreta unidade 65 ba Deputadu sira, ne’ebé tama ona iha faze pre-kualifikasaun no UETL no reprezentante Bankada ne’ebé hetan asentu iha Parlamentu asina akordu ida atu halo diskusaun iha loron 25 Setembru ne’e, hodi halakon Lei Pensaun Mensál Vitalísia.
Jornalista : Natalino Costa
Editora : Julia Chatarina
