DILI, 25 Setembru 2025 (TATOLI)—Federasaun Futeból Timor-Leste (FFTL) liuhosi Treinadór prinsipál Zé Pedro, Kinta ne’e, anúnsia lista Jogadór hamutuk na’in-32 atu kontinua halo preparasaun antes kontra Filipina iha faze kualifikasaun Asian Football Confederation (AFC) Football Cup 2027.
Zé Pedro esplika jogadór hirak-ne’e ne’e sei aranka ba Darwin-Austrália iha finde Setembru ne’e nune’e kontinua tuir treinamentu antes ekipa treinadór deside jogadór 23 iha lista selesaun nasionál hodi kontra Filipina iha faze kualifikasaun Grupu A AFC Asian Cup 2027.
“Ha’u sei hili na’in-23 ne’ebé diakliu hodi sai selesaun nasionál bainhira kontra Filipina ne’ebé konsideradu nu’udár jogu ofisiál dahuluk ba ha’u nu’udár treinadór prinsipál,” Zé Pedro informa ba TATOLI iha edifísiu FFTL, Bairros dos Grilos.
Notísia relevante: Treinadór Zé Pedro sei halo preparasaun ba jogu kualifikasaun AFC Asian Cup 2027
Zé Pedro relata jogadór 32 rekomenda husi FFTL no selesionadu liuhosi etapa rua durante fulan-ida ne’ebé realiza liuhosi treinu másimu no jogadór hirak-ne’e sei kompetitivu hodi hadau pozisaun iha ekipa nasionál Timor-Leste.
“Ha’u sei esforsu aan másimu liután atu oferese rezultadu pozitivu iha faze kualifikasaun bainhira kontra Filipina no Tazaskistaun,” nia akresenta.
Timor-Leste rasik sei iha jogu haat iha kompetisaun kualifikasaun AFC Asian Cup 2027 iha-ne’ebé koloka hamutuk ho nasaun tolu seluk hanesan Filipina, Tazaskistaun no Maladewa. Ekipa Lafaek okupa opozisaun datoluk iha tabele klasifikasaun ho pontu 3, rezultadu husi jogu rua, manán (M) 1 no lakon (L) 1.
Entretantu, tuir oráriu, Timor-Leste sei hala’o jogu volta dahuluk kontra Filipina iha loron-09 Outubru no volta daruak iha loron-14 Outubru. Enkuantu jogu toluk seluk, sei kontra Tazaskistaun iha loron-18 Novembru no jogu ikus kontra Maladewa iha 31 Marsu 2026.
Tuirmai lista Jogadór na’in-32 ne’ebé selesionadu iha ekipa nasionál Timor-Leste hanesan:
Guarda rede: Dylan José Nisk, Georgino da Silva no Jomildo da Silva
Defeza: João Soares, Francisco da Costa, Almerito da Silva, Anizo Correia, Filomeno da Costa, Emidio Braz, Orcelio da Silva, Ryan Zom, Abílio Jerónimo, Mário Quintão, Nélson Viegas no Lexy Atok.
Médiu: Santiago da Costa, Kornelis Nahak, Marques de Carvalho, Fretiliano Santos, Ejivanio da Costa, Leonio Freitas, Cláudio Osório no Zenivio Mota.
Avansadu: Paulo Freitas, João Pedro, Mouzinho de Lima, Zion Cruz, Elias Mesquita, Vabio Pires, Kenny Belo, Leonaldo Costa no João Rangel.
Jornalista: Natalino Belo
Editór: Xisto Freitas da Piedade
