VIKEKE, 26 Setembru 2025 (TATOLI)—Komisaun Nasionál Eleisaun (CNE-sigla portugeza), Sesta ne’e, realiza edukasaun sívika ho tipu debate ba reprezentante partidu polítiku lima ne’ebé eziste iha Munisípiu Vikeke, ne’ebé ho tema “Ita prontu ba eleisaun munisipál”.
Objetivu husi atividade ne’e atu promove lideranssa lokál potensiál sira iha eleisaun prezidente no asembleia munisipál liuhusi debate no fó koñesimentu ba sidadaun eleitór sira iha nivel munisípiu hodi hatene kona-ba eleisaun munisipál sira.
“Ami agradese ba prezidente autoridade nia apoia ba realizasaun debate ida-ne’e inklui mós Komadante Polísia Nasionál Timor-Leste (PNTL) Munisípiu Vikeke,” José Agostinho da Costa Belo hateten iha serimónia debate entre partidu polítika lima ne’ebé asentu iha Parlamentu, iha salaun Administrasaun Munisípiu Vikeke.
Belo haktuir debate ida-ne’e importante ba lideransa polítika lokál sira hodi halo preparasaun ba iha eleisaun munisipál ne’ebé sei realiza iha 2027.
“Vikeke atu di’ak ka ladi’ak uma-laran mak sai fonte ba unidade. Ita sempre iha diferensa hanoin tanba liuhusi diferensa ne’e mak ita kondús ita-nia rain, maibé diferensa labele sai fali ita-nia obstáklu ida hodi fahe malu,” nia akresenta.
Nia dehan, debata ida-ne’e sai hanesan espasu ida-ne’ebé CNE oferese ba partidu lima ne’ebé asentu iha Parlamentu mak hanesan CNRT, FRETILIN, Partidu Demokrátika (PD), KHUNTO no PLP.
Iha fatin hanesan, Prezidente Autoridade Munisípiu (PAM) Vikeke, Francisco Cruz Simões de Gonzaga Soares hateten debate ida-ne’e Vikeke marka tan istória ida hodi hetan oportunidade hodi líder partidu sira espresa sira-nia prontidaun ba hasoru eleisaun munisipál Vikeke ba desentralizasaun no podér lokál.
“Tanba ne’e, ha’u nu’udár Prezidente Autoridade hakarak subliña katak eleisaun munisipál la’ós prosesu polítiku de’it, maibé momentu ida-ne’ebé ita-nia povu hakarak hatudu sira-nia maturidade demokátika liuhusi debate. Nune’e, partisipa iha debate ho respeita malu no atu fó prioridade ba interese povu nian. Kandidatu debatór sira-nia ideia ne’ebé sabedoria sei sai hanesan dadus ida ba prosesu dezenvolvimentu Munisípiu Vikeke,” nia hato’o.
Nia sujere ba debatór sira fó argumentu ba prinsípiu, transparénsia, respeitu no responsablidade no nia fiar katak debate ida-ne’e sei hetan rezultadu ne’ebé pozitivu.
Iha debate ne’e, partidu lima ne’e kada partidu ida eleje debatór ema na’in-2 ho totál hamutuk na’in-10, durante loron ida iha Munisípiu Vikeke, partisipa husi reprezentante partidu polítiku sira, autoridade lokál, funsionáriu, reprezentante veteranu, PNTL, sosiedade sivíl no estudante sira.
Jornalista: Vitorino Lopez da Costa
Editór: Xisto Freitas da Piedade
