DILI, 26 Setembru 2025 (TATOLI)—Ministru Ensinu Superiór Siénsia no Kultura (MESSK), José Honório da Costa Pereira Jerónimo informa MESSK kontinua promove siénsia dezenvolvimentu ba juventude liuhosi promosaun lian portugés.
“Ohin Ministériu Ensinu Superiór Siénsia no Kultura selebra Loron Mundiál Siénsia Dezenvolvimentu hodi kontinua promove língua portugeza ba joven sira, nune’e ohin profesora ne’ebé iha MESSK hamutuk ho sira-ne’ebé tuir kursu portugés nivel II ba vizita fatin balun iha Dili laran hodi husu pergunta ho lian portugés,” José Jerónimo hateten ba jornalista sira iha resintu MESSK, Kolmera, Dili, Sesta ne’e.
Govenante ne’e hatutan ida-ne’e hanesan kompetisaun ida ba profesór sira-ne’ebé tuir kursu portugés no motiva oinsá aprende no ko’alia lian portugés ho di’ak.
“Tanba portugés ne’e la’ós aprende iha saladeaula de’it maibé iha li’ur mós bele ka iha fatin ne’ebé de’it bele aprende,” nia esplika.
Tanba ne’e, nia husu ba Instituisaun Ensinu Superiór iha Timor-Leste tenke aprende portugés tanba lian ofisiál mak tetun no portugés.
Nune’e mós, Profesora Suzana Mendonça hateten Loron Mundiál Ensinu Superiór nian ne’e babain selebra ho atividade hanesan halo diskursu no Paddy Paper.
“Objetivu hosi Paddy Paper ne’e atu funsionáriu sira kontaktu ho lian portugés iha saladeaula no bele mós iha li’ur. Iha li’ur ami fó formuláriu de’it ho giaun ida atu sira la’o hodi prenxe. Fatin ne’ebé ita identifika mak Jardim 05 de Maio, Pateo, AMRT, Restaurante Delicious,” Suzana esplika.
Jornalista: Osória Marques
Editór: Xisto Freitas da Piedade
