Ainaru, 26 Setembru 2025 (TATOLI)-Ministru Obra Públika, Samuel Marçal, Vise-Prezidente ba Asuntu Parlamentár, Adérito Hugo, no Prezidente Bee Timor-Leste (BTL), Gustavo da Cruz, inagura projetu bee-moos iha suku Maubisse, postu administrativu Maubisse Vila, munisípiu Ainaru.
Ministru Samuel Marçal hateten povu Maubisse durante ne’e pasiénsia hodi hein, maski dezenvolvimentu la’o tarde, maibé iha esperansa nafatin ohin loron hahú hakat neineik no konsege asesu ona bee-moos.
“Ohin ita mai iha ne’e la’ós inagura ba bee-moos de’it, maibé mai atu rona mós saida mak povu ne’e presiza, tanba Primeiru-Ministru orienta ha’u bainhira simu pose dehan tenke tau importánsia ba infraestrutura bázika sira iha territóriu, tanba nia hatene povu nia terus”, Samuel Marçal hateten iha sede suku Maubisse Vila, ohin.
Iha serimónia ne’e marka prezensa mós husi membru Governu lubuk ida tanba hakarak rona saida mak povu ida-ne’e hato’o, tanba responsabilidade atu halo dezenvolvimentu ne’e la’ós ukun-na’in nian de’it, maibé hothotu nia kontribuisaun.
“Iha fatin barak ha’u bá, povu sempre halerik ba dezenvolvimentu mak bee-moos, estrada no eletrisidade. Ida-ne’e povu nia direitu atu ezije tanba nasaun, Estadu iha maihusi povu nia luta mak harii. Tanba ne’e, Governu se de’it mak ukun iha devér tomak serbí povu ida-ne’e ho di’ak”, nia dehan.
Prezidente Bee Timor-Leste, Gustavo da Cruz, hateten projetu bee-moos ne’ebé halo inaugurasaun ne’e hahú iha tinan kotuk tuir kontratu termina fulan neen, maibé tanba hasoru difikuldade oioin iha mudansa klimatika, nune’e foin finaliza iha tinan ne’e.
Tuir nia, projetu ne’e rasik iha pakote rua mak dahuluk halo kanalizasaun husi bee ulun mai tanke rezervatóriu ne’ebé responsabiliza husi empreza Malaka Unipessoal Lda, no projetu daruak mak konstrusaun rezervatóriu ne’ebé responsabiliza husi kompañia Bougenville Unipessoal Lda. Husi projetu rua ne’e gasta orsamentu pur volta rihun $642.
“Projetu ne’e benefisia ita-nia populasaun hamutuk 2.760 no totál uma-kain 467. Husi projetu ne’e ita iha tanke rezervatóriu boot rua ho kapasidade metru kúbiku 150 no tanke redús bee nian hamutuk hitu ho nia kapasidade metru kúbiku 20”, dehan.
Prezidente Autoridade Munisípiu Ainaru, Manuela Carmo Bucar Corte-Real, lori komunidade nia naran hato’o agradese ba membru Governu sira-nia prezensa, tanba hakat mai Ainaru hamutuk halo inaugurasaun bee-moos ne’ebé populasaun hein kle’ur ona.
“Ami agradese tanba ha’u-nia komunidade bele konsumu bee-moos husi BTL. Ita hotu hatene preokupasaun boot ida husi komunidade mak bee-moos, espera ho bee ne’e mai bele apoia atividade ekonomia família nian”, nia dehan.
Aleinde ne’e, prezidente dehan ajuda mós atividade sira seluk hanesan turizmu, tanba hatene katak Maubisse nu’udar fatin turizmu, maibé turista sira ladún vizita tanba falta bee-moos. “Agora bee-moos iha ona, espera ba oin atrai turista barak mai tan tanba iha loos Maubisse Vila”, dehan.
Jornalista: Arminda Fonseca
Editora: Maria Auxiliadora
