TOMAK servisu hamutuk ho grupu lima iha Vikeke prodús hare mean tonelada 19
VIKEKE, 26 Setembru 2025 (TATOLI)—Organizasun Naun Governamentál Toos ba Moris Di’ak (TOMAK) servisu hamutuk ho grupu agrikultór Munisípiu Vikeke iha époka 2025 kolleta ona produsaun hare variedade mean hamutuk tonelada 19.058,59.
Reprezentante TOMAK, Bendito Amaral haktuir kona-ba atividade TOMAK iha Vikeke estabelese grupu hamutuk 21 ho totál membru hamutuk 432. Husi grupu ne’e, grupu lima halai ba produsaun agríkola liuliu ba hare variedade mean ne’ebé hetan asisténsia husi TOMAK.
“Ba tinan ida-ne’e (2025), grupu lima implementa natar ektare 15 ho rezultadu produsaun provizóriu hare mean ne’ebé kolleta ona no ami tetu ona nia rezultadu ne’e hamutuk tonelada 19.058,59,” Bendito Amaral ba TATOLI iha Postu Administrativu Vikeke Vila, Sesta ne’e.
Bendito hatutan husi natar ektare 15 ne’e natar balun seidauk kolleta no balun sei hamoos hela. Bainhira grupu agrikultór sira kolleta tan tiha no hamoos hotu sei bá tetu.
“Iha natar balun mak daudaun ne’e ita-nia grupu agrikultór sira seidauk kolleta no balun seidauk hamoos, maibé hirak-ne’e mak kuandu kolleta hotu ninia produsaun sei liu rezultadu ne’ebé daudaun ne’e iha,” nia otimista.
Aleinde ne’e, nia relata, iha grupu rua mak implementa produsaun agrikultura ne’ebé kuda foremungu ektare rua.
“Grupu rua mak kuda foremungu ektare rua iha tinan ida-ne’e no rezultadu ne’ebé ami tetu ona hamutuk kilógrama 3.707. Produsaun foremungu ne’e ita kolleta ne’e dalaruma to’o dala haat mak foin hotu, nune’e kuandu kolleta hotu rezultadu sei aumenta,” Bendito subliña.
Jornalista: Vitorino Lopez da Costa
Editór: Xisto Freitas da Piedade
