AINARU, 27 Setembru 2025 (TATOLI)–Prezidente Autoridade Munisípiu Ainaru, Manuela Carmo Bucar Corte-Real informa Munisipiu Ainaru preparadu simu polítika desentralizasaun administrativa no podér lokál ne’ebé Governu liuhusi Minstériu Administrasaun Estatál (ΜΑΕ) sei entrega kompeténsia ba kada munisípiu iha tinan 2026.
“Ami prontu no preparadu simu desentralizasaun no podér lokál tanba daudaun ne’e Governu mós apoiu nafatin ami iha aspetu infraestrutura bázika nian no ami rasik mós halo esforsu prenxe rekizitu sira-ne’ebé Governu fó,” Manuela Carmo Bucar Corte-Real hateten iha Ainaru, Sábadu ne’e.
Ko’alia kona-ba preparasaun, nia dehan, nu’udár munisípiu preparadu husi parte administrativu maibé mós tenke haree kondisaun saida mak atu fasilita serbisu munisipál sira-ne’e ba iha komunidade.
“Tanba ita bá ona desentralizasaun podér lokál ita mós tenke iha fonte rendimentu. Ainaru potensiál barak ne’ebé bele dezenvolve hanesan agrikultura, turizmu no seluk tan maibé infraestrutura importante atubele apoiu setór sira-ne’e hodi moris,” Manuela esplika.
Iha fatin hanesan, Vise-Ministru Administrasaun Estatál, Jacinto Rigoberto hateten ko’alia kona-ba desentralizasaun no podér lokál munisípiu hotu tenke prepara aan.
Nia subliña, atu tama ba faze ida-ne’e, rekizitu importante ida mak infraestrutura bázika hanesan ahi, bee-moos no mós estrada.
“Ho ida-ne’e hanoin katak Ainaru prepradu bele sai ona mós munisípiu ne’ebé atu kompete ba iha eleisaun kámara munisipál,” Rigoberto tenik.
Nia lori ministru nia-naran apela ba autoridade hotu hahú husi prezidente autoridade munisípiu, administradór, xefe suku no xefe aldeia sira atu fó apoiu másimu ba prosesu dezenvolvimentu husi parte hotu liuliu iha área infraestrutura nian.
Iha fatin hanesan, Ministru Obra Públika, Samuel Marçal hateten Governu liuhusi Ministériu Obra Públika kontinua apoiu Ainaru entermu infraestrutura bázika.
“Ainaru nu’udár poténsia ba turizmu mak tinan oin sei iha kontratu ba estrada ligasaun husi Fleixa bá Hatobuiliku no Ramelau,” Samuel dehan.
Membru Governu ne’e haktuir foin lalais nia parte mós ko’alia ona ho Primeiru-Ministru, Xanana Gusmão atu hili munisípiu Ainaru sai pilotu fatin tirístiku iha Timor-Leste.
“Primeiru-Ministru konkorda ona. Iha tempu badak ha’u sei mai ho ha’u-nia enjineiru sira nasionál no internasionál mai halo dezeñu Ainaru ne’e halo didi’ak hodi halo fatin turístika tanba Ainaru sai poténsia ba fatin turístika ne’ebé boot tebes,” nia haklaken.
Tuir nia ida-ne’e mós hola-parte munisípiu sira hodi hakat bá desentralizasaun no podér lokál.
Jornalista: Arminda Fonseca
Editór: Xisto Freitas da Piedade
