DILI, 27 Setembru 2025 (TATOLI)–Ministru Obra Públika, Samuel Marçal akompañadu husi Vise-Ministru Asuntu Parlamentár, Adérito Hugo da Costa halo inaugurasaun ba ponte Abatu iha Postu Administrativu Same Vila, Munisípiu Manufahi.
Ponte refere konstrui husi empreza Starking Unipessoal, Lda, hahú husi Outubru 2023 no termina iha 2024 nia rohan, ho nia medida naruk metru 18 no luan metru 8 ho totál orsamentu $856.113,56.
Prezidente Autoridade Munisípiu Manufahi, Luís Tavares agradese ba Governu sentrál, liuliu Ministériu Obra Públika ne’ebé hatán ona nesesidade povu nian hodi konstrui ponte Abatu, ohin loron bele hetan inaugurasaun.
“Ha’u lori povu Manufahi nia naran hato’o agradesimentu ba Governu tanba ohin konsege inaugura ona ponte Abatu ne’ebé finaliza kle’ur ona. Ami-nia ezijénsia mak lori dezenvolvimentu mai no bainhira dezenvolvimentu ne’e mai ami mós iha devér asegura obra sira-ne’e,” Luís Tavares hateten iha Manufahi, Sábadu ne’e.
Nia esplika ponte ida-ne’e finaliza tanba hetan kolaborasaun ho komunidade, ida-ne’e hola parte komunidade nia kontribuisaun.
“Ha’u husu komunidade Manufahi tomak nafatin kontribui ba dezenvolvimentu. Mai ita serbisu hamutuk hodi asegura nafatin projetu Governu sentrál nian. Ohin ponte hetan ona inaugurasaun, ida-ne’e importante tebes oinsá atu fasilita ita iha fatin ne’e,” nia hateten.
Nia afirma povu tenke kontribui ba dezenvolvimentu hotu-hotu liuliu infraestrutura báziku, labele halo impedimentu tanba setór produtivu atu la’o presiza infraestrutura tenke la’o.
Iha fatin hanesan, Vise-Ministru Asuntu Parlamentár, Adérito Hugo da Costa hateten nu’udár Manufahi-oan husu komunidade nafatin hamutuk kontribui ba dezenvolvimentu.
“Ita hotu hatene ita-nia estudante sira iha Dili halo manifestasaun husu Governu no Parlamentu Nasionál orsamentu tenke prioriza setór produtivu sira, entaun imi tenke kontribui ba dezenvolvimentu ne’ebé la’o iha munisípiu ida-ne’e,” nia sujere.
Relembra katak ponte Abatu kotu tanba kauza husi udan-boot ne’ebé akontese hodi hamosu inundasaun iha loron-Domingu, 02 Jullu 2023.
Jornalista: Arminda Fonseca
Editór: Xisto Freitas da Piedade
