VIKEKE, 11 Outubru 2025 (TATOLI)—Autoridade Munisípiu Vikeke inaugura estrada ho distánsia metru 670 diresaun Aldeia Tatilari laran, Suku Matahoi, Postu Administrativu Uatulari, Munisípiu Vikeke.
Iha serimónia inaugurasaun ne’e Reprezentante Prezidente Autoridade Munisipál (PAM) Vikeke, Luís António S. Soares hateten estrada ne’e obra Programa Nasionál Dezenvolvimentu Suku (PNDS) tinan 2025 ne’ebé suku Matahoi deside implementa reabilitasaun estrada sirtu iha Aldeia Tatilari laran hodi populasaun sira asesu.
“Ohin ita hamutuk hodi halo inaugurasaun ba obra PNDS ba tinan 2025 nian, ne’ebé Suku Matahoi konklui reabilitasaun estrada ne’e,” Luís António hateten iha ámbitu inaugurasaun estrada sirtu, iha Tatilari, Sábadu ne’e.
Nia solisita autoridade lokál sira tenke tau-matan no monitoriza obra PNDS sira-ne’ebé implementa iha suku idak-idak nian.
“Obra PNDS sira-ne’ebé implementadu iha suku idak-idak, ha’u husu autoridade lokál liuliu xefe suku no administradór postu sira tenke haree no monitoriza implementasaun obra, nune’e atinjimentu projetu bele finaliza ho di’ak no kualidade tuir komunidade nia hakarak,” nia hato’o.
Aleinde ne’e, Diretór PNDS Munisípiu Vikeke, Francisco Soares Varela apresia komunidade Suku Matahoi tanba bele konklui ona obra reabilitasaun estrada sirtu husi programa komunitáriu PNDS.
“Implementasaun obra-ne’e nu’udár servisu komunitáriu ne’ebé presiza hetan atensaun másima husi ita-nia komunidade ninia kontribuisaun. Nune’e, ha’u husu ba autoridade sira ita presiza koopera no kolabora ba implementasaun obra PNDS atubele finaliza iha kada suku,” nia hato’o.
Notísia relevante: https://tatoli.tl/2025/06/03/pnds-vikeke-sei-implementa-projetu-40-iha-suku-36/
Iha fatin hanesan, Xefe Suku Matahoi, António Amaral haktuir Programa PNDS ba tinan 2025 Suku Matahoi deside implementa reabilitsaun estrada iha Aldeia Tatilari laran hodi fasilita populasaun nia movimentu sira.
“Ha’u sente estrada sai prinsipál tebes ba ami tanba estrada kuandu ladi’ak atividade hotu-hotu labele la’o, maibé kuandu estrada di’ak dezenvolvimentu sei la’o. Tan ne’e, ha’u prioriza liubá estrada, nune’e labele prejudika dezenvolvimentu sira seluk,” nia subliña.
Entretantu, Xefe Aldeia Tatilari, Paulino Guterres Amaral hato’o agradesimentu ba PNDS tanba reabilita ona estrada liga iha bairru Tatilari laran tanba kondisaun estrada uluk difikulta tebes populasaun iha tempu udan, karreta no motorizada sira labele to’o iha komunidade nia uma oin, maibé agora karreta bele tama ho di’ak.
Nia esplika obra reabilitasaun estrada sirtu ne’e benefísia populasaun totál hamutuk na’in-420 kompostu husi feto na’in-345 no mane na’in-386 ho totál uma-kain hamutuk 155.
Obra PNDS ba reabilitasaun estrada sirtu iha Suku Matahoi gasta $31.546,92, estrada ho distánsia metru 670, drenajen metru 400, tembok penahan distánsia metru 800, deker unidade tolu, konstrui husi badaen lokál ne’ebé hahú implementa iha Juñu 2025.
Tuir dadus, Suku Matahoi iha adeia hamutuk 12 ho totál populasaun 5.578 no totál uma-kain 1.368.
Serimónia inaugurasaun ne’e partisipa husi diretór munisipál, Komdante Polísia Nasionál Timor-Leste (PNTL) Eskuadra Uatulari, funsionáriu PNDS, autoridade lokál Postu Uatulari, veteranu Uatulari no populasaun Suku Matahoi.
Jornalista: Vitorino Lopez da Costa
Editór: Xisto Freitas da Piedade
