MANUFAHI, 28 Setembru 2025 (TATOLI)—Ministru Obra Públika, Samuel Marçal ho ekipa, Domingu ne’e, halo observasaun direta ba projetu konstrusaun morru protesaun mota Karau-Ulun, iha Suku Betanu, Postu Administrativu Fatuberlihu, Munisípiu Manufahi.
Ministru Obra Públika, Samuel Marçal hateten objetivu halo observasaun ne’e hakarak atu haree progresu serbisu kompañia nian iha terrenu hafoin asina kontratu ho Governu ba implementasaun projetu konstrusaun morru protesaun.
Iha fatin hanesan, Enjiñeiru Tékniku Kompañia Hunter Construction Upessoal, Lda, Herman Tilman Ulu-Bau hateten projetu konstrusaun morru protesaun ne’e rasik sira asina kontratu iha 02 Maiu 2025, durasaun konstrusaun fulan neen.
“Ami serbisu efetivu ne’e foin fulan tolu resin. Progresu agora atinje ona 43%. Tuir planu, sei termina iha 02 Novembru 2025,” Herman Tilman Ulu-Bau hateten iha mota Karau-Ulun, Manufahi.
Nia haktuir difikuldade ne’ebé sira hasoru mak mudansa klimátika (udan hela de’it) afeta ba serbisu, tan ne’e, ho difikuldade sira-ne’e, projetu konklui la tuir tempu no sei halo fali pedidu atu estende tan tempu.
Orsamentu ne’ebé gasta ba obra ne’ebé ho nia distánsia ka naruk metru 632, luan metru lima no aas metru lima ne’e $1.500.000.
Jornalista: Arminda Fonseca
Editór: Xisto Freitas da Piedade
