DILI, 09 Outubru 2025 (TATOLI)–Jogu kualifikasaun faze Grupu A AFC Asian Cup 2027 rezulta ekipa The Azkals Filipina hurlele ekipa Lafaek Timor-Leste 1-4, iha Darwin-Austrália, Kinta ne’e.
Ekipa rua hala’o jogu iha parte dahuluk ho rezultadu Filipina ne’ebé koñesidu ho The Azkals (Asu Fuik) ne’e lidera ho skor 0-2, iha-ne’ebé golu rua referida enxe husi jogadór Kristensen (10) iha minutu-16 no 32.
Elementu Carles Cuadrat domina iha kampu durante minutu-45 bainhira implementa sistema high pressure no tátika one two entre jogadór sira bainhira invade área defeza Timor-Leste.
Notísia relevante: Jogu kontra Filipina nu’udár oportunidade dahuluk ba treinadór Zé Pedro
Enkuantu, ekipa Lafaek bainhira hetan bola maioria halo pasajen bola aas iha-ne’ebé fásil tebes ba jogadór Filipina atu trava bola.
Iha parte daruak hafoin intervalu, Zé Pedro inísia halo mudansa estratéjia iha-ne’ebé substitui jogadór João Pedro (10) ba Jom no hasai Osório troka ho Vibio Canovaro, hasai Quintão troka ho Zenivio iha minutu-46 ne’ebé fó rezultadu golu 1-3 liuhosi jogadór Galy Freitas iha minutu-47.
Notísia relevante: Timor-Leste Vs Filipina, sé mak sei sai vensedór?
Maibé, mudansa estratéjia referida aumenta Lafaek dolar liután tanba ekipa The Azkals Filipina prodús aumenta golu rua iha minutu-49 no 56 liuhusi jogadór Kristensen hodi taka jogu ikus ho skor 1-4.
Husi rezultadu jogu referidu, rezulta selesaun Filipina lidera provizória tabela klasifikasaun ho pontu hitu (7), rezultadu manán rua (2) no impata ida (1), enkuantu Timor-Leste nafatin mantein iha pozisaun datoluk ho pontu tolu (3) hafoin manán ida (1) no derrota rua (2).
Entretantu, Tazaskistaun iha pozisaun daruak ho pontu haat (4), rezultadu husi manán ida (1) no impata ida (1), pozisaun dahaat okupa husi Maladewa ho pontu 0 hafoin derrota jogu rua.
Line up Timor-Leste (5:4:1)
Georgino da Silva (1/GK), Ryan Jom (2), Anizo Correia (23), Francisco da Costa (4), João Soares (5), Nelson Viegas (22), Santiago da Costa (15), Cláudio Araújo (8), Mouzinho de Lima (11), João Pedro (10), Galy Freitas (21).
Line up Filipina (4:3:3)
Mendoza (1/GK), Baccay (14), Aguinaldo (12), Tabinas (4), Kempter (20), Reyes (6), Nyholm (5), Schneider (11), Leopold (7), Kristensen (10), Gayoso (9).
Jornalista: Natalino Belo
Editór: Xisto Freitas da Piedade
