Jogu kontra Filipina nu’udár oportunidade dahuluk ba treinadór Zé Pedro
DILI, 08 Outubru 2025 (TATOLI)—Jogu kontinuasaun faze kualifikasaun grupu A AFC Asian Cup 2027 entre Timor-Leste no Filipina sai oportunidade dahuluk ba Zé Pedro atu hatudu kualidade nu’udár treinadór.
Komentatór Futeból, Joaquim Lopez Vide esplika prezensa treinadór prinsipál Zé Pedro iha selesaun nasionál hasoru dezafiu tanba dezenvolvimentu futeból Timor-Leste foin iha faze inísiu maibé ho esperiénsia ne’ebé iha sei aumenta responsabilidade iha karreira nu’udár treinadór.
“Jogu kontra Filipina sai fatór determinasaun ida ba Zé Pedro. Ida-ne’e nu’udár responsabilidade boot bá-oin nu’udár treinadór iha selesaun nasionál,” Joaquim Vide informa ba TATOLI iha Bairro dos Grilos, Kuarta ne’e.
Notísia relevante: Kontra Filipina, Zé Pedro anúnsia lista jogadór
Joaquim Vide haktuir esperiénsia ne’ebé Zé Pedro iha bele ajuda hadi’a futeból Timor-Leste tantu iha interna no esterna bainhira lori ekipa selesaun nasionál hasoru kompetisaun iha nivel internasionál hanesan kualifikasaun AFC Asian Cup.
Nia depozita konfiansa ba Zé Pedro ne’ebé konsideradu nu’udár treinadór husi europeia ne’ebé sei lori mudansa tátika no estratéjia ba ekipa Lafaek liuliu bainhira jogu kontra Filipina ne’ebé konsideradu jogu dahuluk ba Zé Pedro nu’udár treinadór.
“La’ós fásil ba Zé Pedro tanba tempu limitadu maibé hanesan ema profisionál iha mentalidade atu konfrontu durante kompetisaun internasionál,” Joaquim Vide akresenta.
Entretantu, Zé Pedro Salazar asume pasta nu’udár treinadór hafoin selebra kontratu ho Federasaun Futeból Timor-Leste (FFTL) iha loron-27 Agostu no hahú efetivu iha fulan-Setembru ho durasaun kontratu tinan-ida ne’ebé tuir kláuzula fó prestasaun iha jogu kompetisaun AFC no AFF inklui fó asisténsia iha departamentu tékniku liuliu dezenvolve kurrikulu futeból.
Aleinde ne’e, FFTL depozita konfiansa hodi hili treinadór José Pedro liuliu hakarak eleva no adapta métodu jogu europeia espesiál Portugál tanba haree ba esperiénsia hanesan eis jogadór ekipa nasionál no ikus sai treinadór iha Portugál.
Dixiplina sai xave importante ba ekipa Timor-Leste
Iha parte seluk, observadór futeból Timor-Leste konsidera dixiplina sai xave importante ba ekipa selesaun nasionál lideradu husi treinadór prinsipál Zé Pedro bainhira kontra Filipina iha jogu kontinuasaun kualifikasaun AFC Asian Cup, iha 09 Outubru tinan ne’e.
Komentatór ne’e esplika jogu entre Timor-Leste kontra Filipina sei atrativu no kompetitivu mezmu Futeból Filipina avansadu liu Timor-Leste.
“Ita iha vantajen boot tanba jogadór barak mak partisipa kompetisaun iha rai-li’ur. Ida-ne’e sei fó impaktu di’ak maibé presiza dixiplina,” Joaquim Vide informa ba TATOLI.
Nia dehan mezmu tempu limitadu ba preparasaun maibé ho treinadór prinsipál foun lori espíritu foun, estratéjia ne’ebé avansada sei lori rezultadu pozitivu ba selesaun nasionál Timor-Leste iha kompetisaun kualifikasaun AFC Asian Cup.
Nia rekoñese istorikamente ekipa Lafaek derrota dala lima no manán dala ida bainhira kontra Filipina, maibé Futeból Timor-Leste hahú iha mudansa hanesan dixiplina no tátika, posibilidade jogadór Lafaek bele halo istória foun bainhira kontra Filipina.
Antes ne’e, Treinadór Zé Pedro anúnsia ona lista jogadór hamutuk 23 ne’ebé admitidu atu joga kontra Filipina hafoin hala’o treinu no selesaun durante fulan-ida.
Tuir tabela klasifikasaun Grupu A, ekipa Tazaskistaun mak lidera ho pontu 4 husi totál jogu rua, rezultadu husi manán ida (1) no impata ida (1), Filipina iha pozisaun daruak ho pontu haat (4), rezultadu manán ida (1) no impata ida (1).
Enkuantu, Timor-Leste rekolla pontu tolu (3), rezultadu manán ida (1), derrota ida (1) no Maladewa okupa iha pozisaun dahaat ho pontu 0 hafoin derrota dala rua husi totál jogu rua (2).
Jornalista: Natalino Belo
Editór: Xisto Freitas da Piedade
