DILI, 29 Setembru 2025 (TATOLI)—Governu liuhosi Ministériu Administrasaun Estatál (MAE) introdús matadalan relasiona ho preparasaun kompetisaun entre suku iha Munisípiu Baukau.
Koordenadór Juri Nasionál atuál Diretór Jerál Desentralizasaun no Governu Lokál, António Augusto Guterres esplika Governu planeia implementa kompetisaun entre suku bazeia ba Lei Suku numéru 09/2016, artigu 06 no 23 ne’ebé atribui kompeténsia ba kada suku iha territóriu nasionál.
“Objetivu kompetisaun atu avalia prosesu dezenvolvimentu ne’ebé implementa husi Governu sentrál iha suku la’ós de’it ba PNDS no PDIM maibé projetu balun ne’ebé direta mai husi liña ministeriál ne’ebé iha aldeia no suku nia benefísiu direta ba povu ne’e to’o iha ne’ebé,” António Guterres hateten iha Vila Antiga, Baukau, Segunda ne’e.
António relata kritéria prinsipál ba kompetisaun entre suku sei foku ba serbisu administrasaun suku ne’ebé implementa husi xefe suku, membru konsellu suku inklui funsionáriu suku na’in-haat ne’ebé haree ba asuntu sira hanesan edukasaun, saúde, seguransa alimentár inklui ambiente.
Aleinde ne’e, iha kompetisaun sei haree mós ba maneira no rezultadu husi prenxementu livru 18, sistema integradu aldeia nian ba portal munisipál no balkaun úniku ho objetivu enkoraja autoridade suku sira no promove iha baze hodi kontribui ba iha prosesu dezenvolvimentu.
“Prémiu ne’e ita labele fó-sai, maibé iha sertifikadu no osan,” Atuál Diretór-Jerál Desentralizasaun Governasaun Lokál ne’e argumenta.
Entretantu, tuir planu, suku ne’ebé sai vensedór ho kategoria klasifikasaun dahuluk sei reprezenta munisípiu ba nasionál, enkuantu, klasifikasaun daruak no datoluk sei to’o iha Autoridade Munisipál Baukau hodi hein atribui sertifikadu no prémeiu iha Selebrasaun Proklamasaun Independénsia RDTL, 28 Novembru.
Jornalista: Natalino Belo
Editór: Xisto Freitas da Piedade
