MDRHC prioriza setór ortikultura, peska no pekuária iha Kovalima
KOVALIMA, 29 Setembru 2025 (TATOLI)- Ministériu Dezenvolvimentu Rurál no Abitasaun Komunitária (MDRHC) fó prioridade hodi implementa atividade sira hanesan ortikultura, Peska no Pekuária iha munisipiu Kovalima.
“MDRHC eziste iha munisípiu Kovalima 2024 bazeia ba baze legál dekretu-lei númeru 48/2024 kona-bá programa revitalizasaun komunitária no garante empregu ho fonte rendimentu ne’ebé diversifikadu no sustentavél”, Koordenadór Destakadu MDRHC, Gilberto Barros da Costa Gusmão, informa ba TATOLI, iha Bairu Kosta, ohin.
Implementasaun atividade ortikultura foku ba kuda modo, nune’e tékniku sira halo de’it akompañamentu no fasilita grupu sira faan sira-nia modo iha merkadu hodi hetan rendimentu atu sustenta sira-nia família.
Atividade peska, nia dehan tékniku sira fó apoiu ró, redi, coolbox no mákina hodi peskadór sira hetan rendimentu hanesan loron ida hetan $10 no sei fahe $5 hodi rai no $5 maka sira uza ba nesesidade uma-laran ni’an.
Tuir dadus MDRHC konsege estabelese ona grupu 81 ne’ebé kada grupu ho nia membru mínimu 15 no másimu nia membru na’in-20
Atividade ne’ebé maka MDRHC implementa ne’e iha postu Administrativu Suai, Tilomar, Maucatar no Postu Zumalai ne’ebé implementa iha suku 12 ho nia aldeia 25 iha munisípiu Kovalima.
Ho nune’e, funsionáriu husi MDRHC mós hasoru difikuldade maka hanesan laiha transporte atu fasilita servisu no mós laiha ekipamentu IT maka hanesan komputadór ne’ebé ho totál funsionáriu hamutuk 38 inklui ho tékniku espesialidade na’in-rua.
Jornalsta: Celestina Teles
Editór:Florencio Miranda Ximenes
