DILI, 29 Setembru 2025 (TATOLI) – Parlamentu Nasionál (PN) aprova adezaun Timor-Leste ba Tratadu kona-ba Zona Livre Arma Nuklear iha Sudeste Aziátiku (SEANWFZ, sigla inglés).
Proposta rezolusaun númeru 23/VI/2a deputadu sira aprova ho votu a favór 54 kontra no abstensaun 0.
Akordu ne’e adotadu iha Bangekoke, 15 Dezembru 1995, ho objetivu asegura totál auzénsia arma nuklear iha rejiaun Sudeste Aziátiku no konstitui pilár arkitetura rejionál no seguransa ASEAN.
Ho prezente ne’e, iha Siméira ASEAN da-46 realiza iha Malázia, iha Maiu 2025, líder sira deside admite formalmente Timor-Leste hanesan membru da-11 ASEAN sei ofisializadu iha Simeira ASEAN da-47 iha Malázia iha loron 26 fulan-Outubru tinan ne’e.
Tuir relatóriu no paréser Komisaun B ba Asuntu Negósiu Estranjeiru, Defeza no Seguransa, konsidera adezaun ba matéria ne’e juridikamente adekuadu no politikamente konveniente, reforsa kompromisu nasionál ho la’ós proliferasaun no dezarmamentu nuklear, no konsolida integrasaun rejionál iha kuadru ASEAN.
Nune’e Komisaun nia pareser favoravel ba aprovasaun adezaun país nian ba tratadu ne’e.
Tuir Konstituisaun artigu 95 alíena f) iha númeru 3 kompete ba Parlamentu atu aprova matéria ne’e tuir proposta Governu.
Jornalista: Nelson de Sousa
Editora: Maria Auxiliadora
