SMA Kovalima prepara fini batar noi-mutin no sele tonelada ualu hodi distribui ba agrikultór

KOVALIMA, 29  Setembru 2025 (TATOLI)- Servisu Munisipál Agrikultura (SMA) Kovalima prepara ona fini batar noimutin no sele hamutuk tonelada ualu atu distribui ba agrikultór sira.

“Ami  prepara hela fini batar noimutin ho batar sele hamutuk tonelada ualu atu halo distribui ba toos na’in sira  bainhira iha tempu udan hodi sira bele kuda iha sira-nia toos”, Diretór Servisu Munisipál Agrikultura Kovalima, Lino Magno , relata dadus ne’e,  ba TATOLI, iha  MC.

Daudaun ne’e, Fini batar rai iha armazein agrikultura Kovalima ne’ebé nia orsamentu mai husi Diresaun Nasionál, orsamentu la’os prepara husi munisípiu ne’ebé fini batar ne’e hahú  distribui uluk  ba agrikultór ne’ebé iha postu administrativu.

Makanizmu distribuisaun mak foku uluk fini batar ba postu administrarivu ne’ebé iha parte foho hanesan, Fatululik, Fatumea,Fohoren,Tilomar, Maucatar hafoin kontinua distribui ba postu sira Suai no Zumalai.

Fini batar ne’e foku distribui ba agrikultór ne’ebé maka halo toos iha parte rai maran ne’ebé daudaun ne’e seidauk halo distribuisaun tanba sei hein  dadus husi koordenadór postu administrativu sira hafoin bele halo  distribuisaun fini batar.

Tuir planu Diresaun Nasional sei transporta tan fini batar  noimutin no sele  faze daruak hamutuk tonelada lima mai iha munisipiu Kovalima hodi distribui ba agrikutor sira iha postu administrativu ne’ebe maka pertense ba  Kovalima.

Polítika Governu kada tinan sempre halo distribuisaun fini batar ba agrikultór sira ho nune’e produsaun batar iha 2025 agrikultór sira konsege prodús batar tonelada 7,827,53.

 Husi dadus ne’ebé maka mai husi postu administrativu hitu  mak agrikultura sira halo kultivasaun  ho tipu Prátika Agrikultura Di’ak (PAD) , konvensionál  ho tradisionál ne’ebé bazeia ba kalkulasaun nia rezultadu mai husi postu hitu hamutuk 13,35 sei fahe ba postu administrativu hitu nia rezultadu 1,90 kali fali 4119,75  ho rezultadu produsaun  atinje hamutuk  tonelada 7,827,53.

Jornalsta: Celestina Teles

Editór:Florencio Miranda Ximenes