DILI, 29 Setembru 2025 (TATOLI) – Parlamentu Timor-Leste (TL) halo aprovasaun ba adezaun país ba Konvensaun Asosiasaun Nasaun Sudeste Aziátiku (ASEAN, sigla inglés) kona-ba kontra Tráfiku Ema, espesialmente Feto no Labarik, adezaun ba Konvensaun ASEAN kona-ba Kombate Terrorizmu, no adezaun país ba Tratadu Asisténsia Mútua iha Matéria Penál.
Kona-ba Konvensaun ASEAN kontra Tráfiku Ema ne’e adota iha Kuala Lumpur, Malázia, iha 21 Novembru 2015 ho objetivu mak reforsa kooperasaun rejionál iha prevensaun, represaun no eliminasaun tráfiku ema ho espesiál foku iha protesaun vítima no iha aplikasaun prinsípiu direitu internasionál no direitu umanu.
Konsidera país nia adezaun ba Konvensaun ne’e prevista iha roteiru ba adezaun plena, ne’e mekanizmu rejionál seguransa, justisa no protesaun sosiál.
Kombate Terrorizmu
Kona-ba aprovasaun ba proposta rezolusaun númeru 35/VI(3a) adezaun país ba Konvensaun ASEAN kona-ba Kombate Terrorizmu ne’e adota iha Cebu, Filipina, iha 13 Janeiru 2007, ho objetivu mak reforsa kooperasaun entre Estadu-membru iha prevensaun, represaun no eliminasaun terrorizmu iha ninia forma hotu, iha konformidade tuir prinsípiu direitu internasionál inklui direitu umanu no direitu umanitáriu.
Konvensaun ne’e konstitui instrumentu jurídiku esensiál iha kuadru pilár Polítika no Seguransa ASEAN, promove no armonizasaun polítika lejislasaun nasionál iha domíniu luta konta terrorizmu.
Ratifikasaun ne’e prevista iha roteiru ba adezaun iha mekanizmu seguransa no kooperasaun rejionál.
Matéria Penál
Relasiona ho aprovasaun ba propsota rezolusaun númeru 36/VI/(3a) adezaun país ba Tratadu Asisténsia Mútua iha Mateira Penál ne’e adota iha Kuala Lumpur, Malázia, iha 29 Novembru 2004.
Tratadu ne’e ho objetivu mak estabelese kuadru jurídiku kooperasaun iha matéria investigasaun, obtensaun prova, tramitasaun prosesu no forma asisténsia legál seluk iha kauza penál.
Fundamentál iha pilár Polítika no Seguransa ASEAN, promove kooperasaun entre autoridade kompetente kombate efikásia kriminalidade transnasionál organizada no protesaun sistema justisa penál.
Jornalista: Nelson de Sousa
Editora: Maria Auxiliadora
