Uniaun Europeia hein TL nia esforsu promove direitu umanu iha ASEAN
DILI, 29 Setembru 2025 (TATOLI)—Embaixadór Uniaun Europa iha Timor-Leste, Thorsten Bragfede, hateten Uniaun Europeia iha kompromisu hodi sai parseria nune’e mós kontinua hein papel Timor-Leste nia esforsu hodi promove direitu umanu iha Asosiasaun Nasaun Sudeste Ásiatiku (ASEAN, sigla portuges).
Notísia Relevante: Adezaun plena ba ASEAN: KM aprova Rezolusaun haat husi PN no ualu husi Governu
Nia dehan, nia ho Primeiru-Ministru, Kay Rala Xanana Gusmão hala’o ona diskute katak sira iha aliñadu tebes ba valór globál sira hanesan direitu umanu, demokrasia no Estadu direitu iha relasaun internasionál sira, orden multilaterál no Timor-Leste hetan ona benefísiu husi Nasaun Unida iha pasadu, tanba ne’e Uniaun Europeia sai nafatin apoiante forte ba multilateralizmu.
“Ami hein atu rona Timor-Leste nia lian iha ASEAN nia laran iha tempu badak, tanba ida-ne’e sei sai lian ida ba direitu umanu ne’ebé ami respeita tebes,” Embaixadór ne’e informa ba jornalista sira hafoin ramata enkontru ho Primeiru-Ministru, Kay Rala Xanana Gusmão, iha Palásiu Governu, ohin.
Nia haksolok tebes hasoru Primeiru-Ministru Xanana Gusmão, tanba nia hetan nomeasaun nu’udar Embaixadór Uniaun Europeia nian foin semana tolu liubá, maibé nia hetan tempu atu hasoru malu ho Primeiru-Ministru no sira diskute asuntu ne’ebé produtivu tebes.
“Ami ko’alia kona-ba parseria entre Uniaun Europeia ho Timor-Leste, Uniaun Europa apoia ona nasaun ne’e dezde nia independénsia, no ami kontinua sai parseiru dezenvolvimentu importante ida,” nia dehan.
Tanba ne’e, nia dehan, Ubiuab Europeia ativu tebes apoiu iha área oioin hanesan fó apoiu ba agrofloresta, fó apoiu orsamentu no ajuda iha jestaun finansa públika.
Aleinde ne’e, Uniaun Europeia mós mós serbisu hela atu hamenus mánutrisaun hamutuk ho sistema Organizasaun Nasaun Unida (ONU, sigla portugés) nian, no ida-ne’e hatudu katak Uniaun Europeia hanesan parseiru ida-ne’ebé forte iha Timor-Leste nia dezenvolvimentu.
Jornalista : Alexandra da Costa
Editór : Cancio Ximenes
