DILI, 29 Setembru 2025 (TATOLI)—Vítima inséndiu iha área Vila Nova, Aldeia Lutumutu, Suku Tirilolo, Postu Administrativu Baukau Vila, hetan ona apoia emerjénsia husi Autoridade Protesaun Sivíl (APC-sigla portugeza) Munisípiu Baukau.
Komandante Operasionál APC Munisípiu Baukau, Francisco Viana Freitas esplika hafoin kazu inséndiu referidu akontese, APC halo verifikasaun no distribui direta apoia emerjénsia ba vítima kompostu hahán no ekipamentu dapur.
“Ita fó ona apoia emerjénsia ba vítima sira hafoin akontese inséndiu ne’e,” Komandante Operasionál APC Munisípiu Baukau informa ba TATOLI liuhosi telefónema, Segunda ne’e.
Viana relata APC halo ona verifikasaun dadus ba vítima inséndiu referida no sei kontinua informa ba nasionál hodi hein apoia materiál rekuperasaun ba vítima.
Entretantu, vítima Abílio Rosário hateten kazu referidu akontese iha loron-Kinta, 25 Setembru purvolta madrugada 04:00 Otl ne’ebé suspeita ba sirkuitu eletrisidade iha sala vizita no alastra ba plafon hodi rezulta ahi han mutuk uma tomak, kioske inklui sasán uma-laran la salva.
“Ami toba, ahi hahú alastra maka’as mak hakfodak nune’e ami salva aan de’it,” Abílio hateten.
Kazu inséndiu ne’e rejista membru família hamutuk na’in-ualu no rezulta estragu tais, ropa, ekipamentu uma-laran, sasán kioske, dokumentu hanesan diploma inklui osan purvolta besik rihun $10.
Jornalista: Natalino Belo
Editór: Xisto Freitas da Piedade
