DILI, 30 Setembru 2025 (TATOLI)—Inspetora Jerál Autoridade Inspesaun no Fiskalizasaun Atividade Ekonómika Sanitária no Alimentár (AIFAESA, sigla portugés), Odete Viegas, hateten AIFAESA nafatin mantein proposta deklarasaun ne’ebé submete ba Ministériu Públika kona-ba empreza Perisos ne’ebé komete infrasaun no la konkorda ho koima ne’ebé iha.
Notísia Relevante: Durante fulan lima, AIFAESA arrekada reseita rihun $80 ba kofre Estadu
Inspetora Jerál Autoridade Inspesaun no Fiskalizasaun Atividade Ekonómika Sanitária no Alimentár, Odete Viegas, informa kona-ba AIFAESA nia servisu durante ne’e liuliu trimestre datoluk nian atu ramata ona hodi kontinua hakat ba trimestre dahaat nian, nune’e servisu ne’ebé durante ne’e AIFAESA halo inklui mós sansaun ne’ebé sira fó ba operadór ekonómiku sira liuliu empreza Perisos.
“Prosesu la’o hela iha Ministériu Públiku, iha semana kotuk ami ba presta deklarasaun iha Ministériu Públiku no proposta ba empreza Perisos nian ne’ebé la konkorda ho koima ne’ebé ami fó ba sira. Iha Ministériu Públiku mós laiha proposta ruma ne’ebé mak mai husi kompañia Perisos entaun prosesu ita nafatin avansa ba oin,” Inspetora Jerál ne’e informa ba jornalista sira iha nia kna’ar fatin, Matadoru, ohin.
Inspetora ne’e esplika, prosesu ne’ebé AIFAESA asina no notifika ona entaun sira sei la dada fali kazu ne’e, tanba ne’e mak iha Ministéria Públika kompañia sira la define loloos no la negósia kona-ba koima ne’ebé iha, nune’e AIFAESA mantein ho nia pozisaun ba bazeia ba koima ne’ebé fó ba kompañia.
“Proposta ne’e define prosesu rua kona-ba ijiéne nia montante koima hamutuk rihun $5 no ida fali mak sasán estragadu ho montante rihun $60, produtu sira-ne’ebé hetan infrasaun ne’e kompostu husi foos ho marka oioin no masin-midar,” dirijente AIFAESA ne’e hateten.
Aleinde ne’e, nia hatutan, kompañia Perisos mós prosesu infrasaun lubuk ida mak sei tuir mai tan, nune’e AIFAESA iha hela prosesu nia laran hanesan mós kompañia sira seluk ne’ebé sei kontinua hela.
Nia dehan, bainhira prosesu ramata signifika sira selu hotu ona koima ho voluntáriu entaun prosesu AIFAESA sei taka iha Ministériu Públiku.
Notísia Relevante: Perisos seidauk konklui dokumentu no rua seluk hein pagamentu hosi MKAE
Jornalista : Alexandra da Costa
Editór : Cancio Ximenes
