Perisos seidauk konklui dokumentu no rua seluk hein pagamentu hosi MKAE
DILI, 03 maiu 2024 (TATOLI) – Diretora Nasionál Regulasaun Komersiál iha Ministériu Komérsiu no Indústria (MCI), Manuela da Silva Tilman, husu Empreza Perisos atu hadia lalais dokumentu foos subsídiu tanba Empreza Alfa no Kreativu hein pagamentu hosi Ministériu Koordenadór Asuntu Ekonómiku (MKAE).
“Ami husu ba Empreza Perisos atu hadia lalais dokumentu foos subsídiu ne’ebé ami fó, atu submete mai ona, nune’e ami lori ba MKAE atu prosesa pagamentu”, Manuela da Silva Tilman ba TATOLI iha nia kna’ar fatin MCI Bebora, ohin.
Silva subliña, Empreza Alfa no Kreativu furak ninia dokumentu loos ona no hatama ona ba MKAE atu prosesa pagamentu, infelizmente Perisos mak sei hadia hela dokumentu subsídiu nian no seidauk submete mai.
“Empresa Alfa no Kreativu Furak, sira-nia dokumentu ita entrega ona ba MKAE iha semana kotuk liu ba, agora Perisos mak sei hadia, se sira tarde ita mós tenke tuir ida-ne’e”, nia afirma.
Iha fatin hanesan, Diretór Empreza Perisos, James Jong, hatan katak ekipa sira, dadaun ne’e, sei halo verifikasaun ba dokumentu, kuandu hotu tiha mak submete ba MCI atu bele verifika fila hodi bele submete ba MKAE.
“Durante ne’e ami-nia xefe ida kaer dokumentu foos subsídiu ne’e, nia foti lisensa anuál, entaun agora mak nia haree dokumentu sira ne’ebé MCI hato’o mai, entaun agora faze hadia nian iha fulan ne’e ami tenke submete ba MCI, tanba ami mós hakarak pagamentu lalais ba subsídiu ida-ne’e”, Jong konklui.
Notísia relevante : MKAE hein relatóriu husi empreza distribuidór subsídiu foos
Jornalista : Felicidade Ximenes
Editor : Zezito Silva
