DILI, 15 marsu 2024 (TATOLI)—Vise-primeiru Ministru no Ministru Koordenadór Asuntu Ekonómiku no Ministru Turizmu Ambiente, Francisco Kalbuadi Lay, hein relatóriu husi empreza distribuidór ba intervensaun foos iha merkadu ne’ebé Governu asina kontratu ho sira.
“Ha’u husu ona sira. Buat hotu tenke tuir lei,” Francisco Kalbuadi Lay hateten, iha salaun Ministériu Turizmu no Ambiente, horseik.
Nia hateten, maske subsídiu bá foos empreza sira ne’e hala’o hosi Ministériu Komérsiu no Indústria (MCI), maibé ida ne’e mós tutela ba Ministru Koordenadór Asuntu Ekonomia. Komisaun Anti Korrupsaun (CAC), Inspetór Jerál Estadu no Inspesaun sira seluk tenke haree no tau-matan hela, tanba hanesan Timoroan tenke servisu ho fuan.
“Ita tenke onestu ba ba malu tanba povu sai prioridade bá Estadu ida ne’e atu tau matan. Ita halo intervensaun tanba foos ne’e karun, maibé labele iha terseira parte ka pihak ke-tiga atu aproveita ho situasaun ida ne’e, ne’e ha’u lakohi tanba ne’e mak foin daudauk foos ha’u halo kedas hanesan Governu hola rasik ba haree foos ida mai ho kualidade” nia hateten.
Vise-primeiru Ministru no Ministru Koordenadór Asuntu Ekonómiku no Ministru Turizmu Ambiente, Francisco Kalbuadi Lay esplika, “Ita-boot sira (jornalista) mós rona ona katak foos sira ne’ebé mak asegura tinan rua ne’ebé ho folin antes tenke $7 dolar ka $8 dolar, maibé sira aproveita ho situasaun ne’e mós ba $17 dolar”.
“Imi mós kala rona ona, foos balun fa’an iha loja ne’ebe asegura hela kuaze tinan-rua ne’ebé ho folin antes ne’e $7,00 dolar ka $8,00 dolar, maibé ho situasaun subsídiu ne’e sira aporveita hasa’e folin bá $17,00,” nia konsidera.
Tanba ne’e MKAE husu servisu hamutuk ba povu no rai ida ne’e ho di’ak.
Antes ne’e Empreza Loja kreativu Furak, Yati Zaka hateten daudaun ne’e, sira-nia parte karimbu foos subsídiu nia to’o mai ona, maibé seidauk implementa foos subsídiu faze daruak nian tanba sei hein pagamentu hosi Governu hafoin implementa.
“Ami seidauk implementa foos subsídiu ida ne’e, tanba ami sei hein Governu halo pagamentu ba foos subsídiu toneleda 750 ho nia montante orsamentu hamutuk milliaun $1.5 mak foin implementa foos subsídiu faze daruak nian,” Yati Zaka hateten ba Agência Tatoli, iha nia kna’ar fatin Bidau kuarta ne’e.
Entertantu, subsídiu foos ne’ebé mak Governu fó ba empreza importadór hamutuk lima hanesan Kreatif furak, Alfa Dili, Lisun, no Perisos.
Notísia relevante:Pagamentu ba empreza fa’an foos subsídiu hein desizaun Vise-primeiru ministru
Jornalista : Felicidade Ximenes
Editór: Rafael Ximenes de A. Belo
